El program de spor de invierno se eskapo en el 10 de junio. Yıldırımspor Club/Alef Büyükada avrio la sezon de enverano 2023 despues ke las eskolas se serraron en el 17 de junio. Las kreaturas nasidas en 2014-2015 i 2016-2017 partisiparon al program Summer Camp i estan pasando sus vakansas de enverano aziendo diferentes aktividades aparte del sport. Las kreaturas nasidas entre 2009-2013 estan partisipando al program Eskolas de Spor i estan kontinuando a los egzersizes entre semana en las ramas de futbol, basketbol femenino i maskulino, voleybol femenino, tenis de meza i djimnezia, akompanyados kon antrenores profesionales.
Este anyo, aparte del Summer Camp i las Eskolas de Sport, se establesio una grande pisina prefabrikada para ke las kreaturas se egleneyen mas muncho en el klub. Aparte de esto, las kreaturas se estan egleneyando kon diferentes djugos en el trampolin de tierra i de mar.
Aparte de las kreaturas i de los mansevos, los adultos estan pasando un enverano agreavle en YSK. Tres dias a la semana se esta organizando el program sportivo "Fit in Summer" para adultos. Las fines de semana se esta organizando oras de folklor i zumba. Todos los musafires se estan aprovechando de la mar, i en los dias mas kalorozos del enverano, estan pasando unas kuantas oras agreavles en la sombra de los arvoles.
Los midis, estan komiendo los delisiozos platos de Çınar Büfe, ke es el konosido buffet de Büyükada. Este enverano Çınar Buffet esta sirviendo en Alef Büyükada. Çınar Buffet esta aziendo servisio en okaziones espesiales i selebrasiones de aniversarios. Los eventos de noche kon muzika no mankan en Alef. El shabat de 29 de Julio uvo un evento de noche kon la prezantasion de muzika de la skantadora, Zeynep Doruk. Por los eventos de noche los ke keren partisipar kale ke agan rezervasiones de antes.
Los antrenores van a estableser ekipos i los van a aparejar mas fuerte, para embiarlos a los Djugos Maccabiah, ke se van a azer en Londra en 2024 i en Israel en 2025. Se estan esforsando para elevar no solo el desvelopamiento tekniko, sino tambien el desvelopamiento mental de los ekipos. Este anyo van a ogmantar los dias de formasion de las eskolas de sport. Van a kontinuar a la kooperasion klub-famiya-eskola para ke las kreaturas partisipen mas muncho a los egzersizes.
