Estos diyas ay una lokura de Barbie. Todas las mansevikas estan azyendo un maraton a los vistidos roz para pareser a eya. Ya savemos ke Barbie es una kukla ke tuvo muncho sukseso 10-15 anyos antes. Agora salyo su filmo, ken i ken ira a verlo. Puedeser ke i agora tiene muncho sukseso ma komo mis inyetizikas ya se izieron grandes, no tengo mas haber de lo ke se pasa en eyas. No aviya ijika ke no teniya 2-4 Barbies. En kada okazyon se merkava una kukla Barbie a las ijikas. I kon kada Barbie se alegravan muncho. Esta kukla Barbie fue kreyada por una judiya, Ruth Handler. Le dyo el nombre de su ija Barbara.
Desharemos a Barbie, me vino al tino, las kuklas de mi chikes. En mi chikes no aviya kuklas. Se djugava kon kuklas echas kon tovajas. Se aziya una kruz kon dos tovajas, Se desinava boka i ojos i se emburujava aryentro de un taponiko, ke sozde era la fasha. I ansina se djugava. Todos estavan kontentes porke no aviya otro remedyo. Despues de anyos salyeron kuklas de plastik. En primero eran de un pedaso entero, despues ampesaron a azer kuklas kon brasos i pachas movientes. En Pera aviya un magazen de djuguetes. “Japon Pazarı”. Todo muy karo. En la vitrina aviya una kukla el boy de kriyatura, ke meneyava los brasos i aboltava la kavesa, aviya tanbien un treno ke dava tornos en la vitrina entera. No aviya kriyatura ke no se kedava admirando, la nariz apegada al djam, delantre de esta vitrina. Puediyamos kedar oras enteras si no mos travavan del braso para ir a kaza. Aya aviya mil i un djuguete todos uno mas karo de otro.
Yo fui mazaloza porke teniya una kukla maraviyoza.
Kuando nasi, las tiyas de mi madre ke biviyan en Paris, me mandaron una kukla. Komo la tiya de Paris se yamava Rita, le metimos a la kukla el nombre Rita. Rita teniya el mizmo boy ke mi de kuando nasi. Me parese ke era echa de “papier mashé”. Teniya kaveyos verdaderos, ojos ke se meneyan, brasos-kovdos, manos, pachas, dizes i pyezes meneyando i aboltando. Teniya un fostan de tul. Un chapeyo de estera i kalsados i kalsikas de dantel. La boka la teniya un poko avyerta ke se le viya los dientes. I aparte de todo esto, kuando la echava, gritava “mamma”. Para mi era una alegriya de djugar kon Rita. Le aziya kuna, la echava aya, se serravan sus ojos, la kunava, me paresiya ke ya se durmyo. Un diya la kije lavarla, la dezvisti i la ampesi a lavarla, me kedaron los kaveyos en la mano. Yo, yoros i mauyos, pishin korri ande mi mama, porke mi mama topava remedyo para todo. Siguro en akel tiempo no aviya kozas para apegar modernas, aviya tutkal. El tutkal en mojandose se despego. La mama, desho sekar la peruka, i la apego despues yene kon tutkal. Los dientes parese ke eran de papel, i akeyos se desparesyeron. Ma vos dare un buen haber ke Rita bive dainda en mi kaza. Tenemos la mizma edad, ma eya mashalla no se troko del todo. No tiene dolor de espalda, de dizes, diabet, nada. La miri muy bueno. La kero muncho bien, en vezes le avlo, me mira kon sus ojos blus kon admirasyon.
