Kuando pasamos el dia de Tisha be Av empesamos a un kamino mas dulse i yeno de esperansa. Ya savemos ke el mez de Av no es muy bueno para los Djudyos ma el nombre de este mez es muy enteresante. “Av” en Ebreo es “padre.” Ya es djusto ke en este mez fue la destruksyon de el Templo en Yerushalayim ma despues de el dyez del mez empesa el viyaje a la esperansa.
En el kinze del mez tenemos el dia de “Tu be Av.” La Gemara en Taanit mos konta ke este dia es el dia mas mijor para el puevlo Djudyo kon el dia de Kipur. Kipur es fasil para entender porke en el dia el este se perdonan los pekados. Kualo fue en el dia de Tu be Av?
Mos kontan los savyos ke en este dia se terminaron las matansinas en el dizyerto. Kada anyo despues de el pekado de los “meragelim”, kaji kinze mil personas se muryeron. En el anyo kuarenta, en la noche de Tisha be Av se echaron a los foyos ma a la manyana todos estavan bivos. Esto estava muy kuryozo. Se echaron de nuevo a la otra noche i todos se alevantaron bivos. Kuando yegaron a la noche de el kinze del mez i vyeron la luna, ya entendyeron ke ya se terminó esta setensya. Este dia fue un dia de alegria i esperansa.
Oy en Israel este dia tambien es el dia de amor.
Rogamos ke el Todo Poderozo mos baldará todas las setensyas malas i fuertes i ke mos eskriva a los livros de vidas largas i buenas, amen.
