El shifro 4 i sus multiplos se kontan en la Tora munchas vezes. 4 madres de Israel, Sara, Rifka, Rahel i Lea. Los 40 anyos de muestro puevlo en el dizyerto, 40 diyas del fetus en la tripa de su madre, se puede konsiderar komo un umano. Las 4 letras del nombre enprononsavle del Sinyor del Mundo, Yud He, Vav, He son egzemplos ke mos ambeza muestra Tora. Remarkaremos ke Ashem kreo todo kon 4 dimensyones, 4 jeneros komo los metales, vejetales, las hayas i los umanos. Keremos avlar aki de los solides, likides, gaz i enerjiya.
Los 4 degres de muestra alma, Nefesh, Ruah, Neshama, Haya. Toda realita es atada a 4. La Tora fue dada en 40 diyas i tiene 4 dimensiones. Peshat (simple), Remez (rumuz), Drash (komentaryo), Sod (sekreto).
Estas primeras 4 letras P-R-D-S forma el nombre PARDES ke kere dizir la mas alta spiritualitad. El puevlo de Israel tiene 4 padres de la Ley. Avraam, Yitzhak, Yaakov i David, el reynado ke reprezenta la buendad, la djustisya i la splendor.
Israel pasa 4 Galutes (egziles), La Gresya (Roma), Babel (Persya), Yavan i Edom. En Pesah, devemos 4 kupas de vino ke reprezentan 4 salvasyones ke mos izo el Dio Santo. Avlamos mas de los ijos i de las 16 etapes del Seder ke son un multiplo de 4. La famiya se kompoza de “padre i madre, ijo, ija”. Deke el shifro 4 demandamos a muestros savyos, i mos responden de esta manera. Dalet es la kuatrena letra del alfabeto ebreo, su valor es 4, kijo dizir umilidad (dal), i la perfeksyon pasa por umilidad. Despues de 4 Galutes, Israel va alkansar a la salvasyon. Los 4 degres de la alma ke kontimos, son dirijados verso el 5. Degre ke es yehida, la splendor divina.
Despues de los 4 de la Tora vendra el 5. Pora -A- Mashiah. Despues de muestros 4 djustos vendra la epoka de Mashiah, ke es La 5ena dimension, la mas alta. Por esto, el Grande Bendicho El, lo aregalo a Avram de una otra letra de su nombre, i se izo Avraam, por ke este padre de muestra ley, es el ke espandyo la kreensya divina en el mundo.
El mundo, la umanidad pasara kon bueno de la kuatrena a la sinkena dimension, a la dimension del Gan Eden. Kuando vamos a parvinir a la Geula ke mos va amostrar Eliyahu Anavi.
Todos endjuntos lo aresiveremos en avriyendo grande las muestras almas. Amen ve Amen.
