Malorozamente kada enverano tenemos mas kalor i manko luvyas. Reelmente tenemos de menester de las luvyas para topar agua para emplear.
Vos djuro ke ay unas kuantas semanas, dospues ke meldi un artikolo en un diyario o semanario empesi a ekonomizar la agua ke empleo.
Kada demanyana devo de tomar una dush alevantandome de la kama. Antes empleava a lo manko 6-7 puntos la agua para lavarme. Oy esto azyendo atension i empleo solo 3 o 4 puntos la agua, lavandome de la mizma manera ma mas presto.
Arapandome, lo esto azyendo kon una agua ke korre a penas de la fuente. La mizma koza kuando esto furchaladeando los dientes. Mizmo esto serrando la fuente si tengo gana de furchaladear.
En el mupak, dospues de komer o lavando las salatas esto rogando ke avran la fuente lo mas poko posivle.
Viendo esto todo en primero me esto mirikeando para mozotros i tengo espanto de no tener bastante agua. Los ke tyenen mi edad se akodran de los banyos yenos de agua en las kazas. I se azia el banyo solo una vez a la semana para no vazyar las aguas del banyo.
Ma dospues los prezidentes de la munisipalidad lavoraron para trayer la agua de las sivdades ke se topan serka de Estanbol i kon esta populasion alkansamos a tener bastante agua. Espero ke este anyo vamos a tener agua kon las luvyas ke esperamos de ver en septembre i oktobre.
La mas grande desgrasia se va bivir kuando muestros ijos/ijas, inyetas/inyetos se van a engrandeser.
Kada anyo tenemos mas muncha kalor; i si meldash las revistas sientifikas vash a ver ke un malor esta viniendo a muestro mundo.
Ke devemos de azer? Azer atension para ayudar los sientifikos i los responsavles de las munisipalidades.
Malorozamente muestro payis, la Turkiya ke es un payis de agua, en unos kuantos anyos va ser un payis ke tyene problemes en este kampo.
Esta semana avia un artikolo en el New York Times i la traduksion en turko en el semanario Oksijen. Era sovre Irak ke era el payis ande se topava las guertas de Babylon i tenia las tyerras ande se puediya kultivar todo modo de frutas i zarzavates.
Ma Saddam i los ke vinieron al poder izyeron lo ke pudyeron para ke el payis se transforme en un dizyerto.
Espero ke no vamos azer los mizmos yerros.
