Ya vos kontí ke me plaze azer vakansas en las izlas de Gresya. Esta semana mos fuimos a la izla Somos (Sisam) para pasar unos kuantos diyas. Para ir a Samos, kale ir a Kuşadası. De aya, ay katamaranes para pasar a Samos. Por esto en primero, diya de alhad demanyana temprano mos fuimos a Kuşadası. Deshimos las validjaz al otel i de aya abashimoz a la kosta de Kuşadası. Antes de echar un torno, mos fuimos a komer unas kozikas komo sandvich, i despues empesimos a kaminar en la Marina. Ke rikeza de barkas ke aviya en la marina, i en el porto aviya kodja pedaso de vapor ke se iva irse a las izlas de Gresya. En el bodre de la mar kuando el sol se estava echando, tomimos una birika kon patatas fritas i al lado una pizza. Ke kyef ke izimos! A la demanyana temprano mos fuimos ande iva partir el vaporiko para Samos. En primero izimos el check-in, i despues fuimos a la duana i el kontrol del pasaporto. Ya era kaji 9:00. Una ora tomó el viyaje. Abashimos enfrente del porto ande aviya el Rent-a-car de ande tomimos una araba, i de aya al otel. Deshimos las validjas i empesimos azer el program de Samos ke aparejí de mas antes. En primero mos fuimos a Pytagorion. El savyo de matematikas ke se yama Pisagor aya nasyo. Aviya el monumento de Pisagor en el bodre de la mar. De aya kaminando al lado de la mar aviya restoranes i kafés. Mos fuimos a una kaleja ke se yama Blue Street. Muy linda kaleja. La or ya estava pasando la 1:00. Aviya muncha kalor. Tomimos la araba i mos fuimos a Potokaki. Aki ay unas kuantas plajes lado kon lado. Mos asentimos en la Pandios beach. Pishin mos echimos a la mar para arefreskar. Kedimos aya fina las 6:00. Despues tornimos al otel, una dush, vistir i abashar al sentro ke se yama Vathy. Muncha kalor, kaji 32 grados ama el ayre ke aviya estava komo ke estavamos en el vaporiko. Despues de komer mos asentimos en un kafé, komimos dondurma i tornimos al otel. A la demanyana partimos del otel a Monolates. Es un puevlo aryento de los arvoles ande biven los ke azen seramika. Ya estava 10:00, dayinda no se espertaron la djente. Las kayes estavan vazias, sin bruido. De aya abashimos a Kokkari. Muy ermozo lugar. En primero dishimos azeremos dezayuno. Entrimos en un kafé al bodre de la mar. Izimos un buen dezayuno kon las bozes de las sigalas. Despues, kaminimos el puevlo de Kokkari. Todo muy ermozo. Ya apanyimos la 1:00, ya basta este karar de viyaje kultural; ya puedemos ir a la mar. Aya ay unas kuantas plajes serka una al lado de otra. Lemonaki Beach, Tsamadou Beach i Navagos Beach. En en el kamino, dimos karar de entrar a Lemonaki Beach. Izimos muy bueno. La mar estava komo akvaryum. La plaj muy shik, el menu del restorante riko. Mas kualo keremos. Pasimos el tiempo fina las oras 6. Para senar en Vathy, una noche antes ya tomí la nota ke me kero ir al restorante, Meze.
Tomimos unoz kuantos mezelikes. Komo Tzaziki, Grek Salat, Saganaki i empesimos a bever el ouzo ke se beve en Samos ke se yama Franchesko. Pasimos una nochada muy ermoza. A la demanyana metimos las validjaz al oto porke ivamos a tornar a la noche, i empesimos a kaminar la izla. Entrimos al market Lidle, ke es muy konosido. Merkimos unas kuantas kozikas ke no ay en Estanbol, o mas barato de Estanbol i mos fuimos a la plaj ke se yama Posidonio. Pasimos unos kuantos orikas en la plaj, komimos, bevimos i entrimos a la mar. A las 4:00 salimos de la plaj porke el vaporiko de tornar era a las 6.30. Deshimos el oto de ande lo tomimos serka del porto, i tornimos a Kuşadası. Pasimos unos kuantos diyaz maraviyozos en Samos. La mar komo espejo, las komidas muy savrozas, el servisyo 5 estreyas. Si me demandan los ke keren ir a Samos, les digo no pensesh mas otra koza.
Viyajar es una pasion...
