Estos anyos dalkavo en las izlas, esta emposivle de asentar en un kafiko al bodre de la mar porke los turistos vienen komo olas de seles, no deshan ni lugar de pasar, ni siya de asentar. La majorita de los turistos son de payizes arabos ma de mezmo ay i turistos ke vienen de las sivdades o de las rejyones lokalas. En las fin de semanas i en las fiestas no se puede ni kaminar en las kalejas seya en el charshi o seya en las kalejas de la izla. Las izlas son lugares chikos i no pueden areyevar tanta djente. Los ke vienen de afuera ke no keren gastar munchas paras, despues ke kaminan un poko i se kansan, se asentan ensima las yervas i las flores, komen lo ke trusheron kon eyos, azen un poko de siesta i despues deshan todos los chopes aya i se alevantan, se van. Mizmo si ay un konteyner de chopes enfrente de eyos, no toman la pena de irsen asta aya, lo deshan ande estavan asentados.
En la mar Marmara ay 4 izlas serka de Estanbol. Son izlas de kampanya. La primera izla se yama Kınalı. El doredor entero es plaj. Vienen kon vapores i se entran a la mar debaldes. Ma no ay una enstalasyon para kedar diya entero. Los ke se keren vistir i desvistir no tienen unas kabinas. Es solo rivaje. Por esto se van a las kazas, sonan las puertas ande keren entrar i azer sus menesteres i vistirsen. Siguro ke los de kaza no los akseptan, i ansina los ajenos se aravyan i los gritan i los ensultan. Por esto no avren la puerta a dingunos i unos kuantos serran las kazas i se van a la sivdad.
La sigunda izla es Burgaz. Es una izla chika ande en invyerno no moran kaje dingunos.
La tresera izla es Heybeliada. Es komo natura la mas ermoza izla. Antes moravan munchos judios. Aviya la eskola de marina, la akademiya naval. Ma despues, esta eskola se transfero a Gölcük.
La kuatrena i la mas grande izla es Büyükada. Asta estos anyos era una izla muy repozada. Todos se konosiyan. Kuando abashavamos del vapor, pasavamos delantre de los kafes, mos saludavamos kon los ke estavan asentados. Agora no ay ni una kara konosida porke komo vos dishe dingunos de los moradores no keren irsen i enkasharsen aryentro de esta ola de personas ajenas. Ay unos dos klubes ande kale ser miembro para entrar. Del Dio ke ay estos klubes, ke puedemos asentarmos i bever un kafiko o entrar a la mar sin ser deranjados por los ajenos.
Todo ya esta muy ermozo, ma los mansevos mas no keren vinir a las izlas. Solo los ke tienen kriyaturas chikas i los aedados de 65+. Los mansevos no se keren asentar en los klubes porke ya tienen sus okupasyones en kaza. Ma los de 65+ ke keren ver dos karas i pasar tiempo ermozo se van a los klubes i oyen un poko de muzika, avlan dos biervizikos, les pasa un tiempo agreavle. I yo so una de estas personas. Kuando miro a mi entorno i veyo los ke estan asentados, me parese ke estamos en una guerta para los aedados.
Ke azer? El tiempo pasa. Los anyos no kedan ande estan. Lo importante es ke no tengamos dezrepozos. Alegres ke estemos.
