Eve Esther Penso
Los keridos miyos estan durmiyendo en el bedahayim de Pantin, ke es el mas grande de Fransya en la puerta de Paris. Tyenes de irte aya kon araba, si no, deves de kaminar oras, kon la luvia, la inyeve o el sol.
Kada mez, me iva a verlos. Este diya, no me sentiya buena, estava muy triste i
maloroza. Le arogi a mi madre Suzanika de embiyarme un mesaj, teniya menester ke me avlara.
Ya aviya entrado aryento del simiteryo, kuando vide una vyejizika kosha, kaminando avagar avagar. Me aserki de eya kon mi araba i le dishe:
- Madam, ande te estas indo? Te va yevar ande keres.
Eya, en primero, no kijo, no keriya deranjarme. Yo, insisti muncho i la tomi kon mi. Me disho ke keriya vijitar a su ermana ke no era leshos, ama, no konosiya el nombre de la divizyon (Aki, se kamina kon divizion, kayes i
numeros)
Mos prezentimos. Yo, Eve Penso, me miro bueno, paresyo bushkar
en su memorya, avyo grande la boka i me disho, ke en la divizyon de su ermana, enkontro munchas vezes una mujer de Penso ke yorava, ensima de la tomba de su ijo, ke era su ojos i kese aviya ido muy mansevo.
Asigun me disho esto, salti, mis ojos se incheron de lagrimas i me vino tritreyos. Estava avlando de mi mama Suzanne Penso i de mi kerido ermano, Simon Penso.
Kero ke me digash. Komo puede ser el azardo, ke el mizmo diya, a
la mizma ora, en el mizmo kamino i sin araba (no se topa djente ke vyenen sin arabas), ke va topar una vyejizika ke enkontrava mi madre en la mizma divizyon?
Mos fuimos a muestro lugar, yo a vijitar mi mama i mi ermaniko i eya su famiya. Dospues, le dishe ke tengo de ver a mi Papa, Raphael, mis nonos i mi tiyo Nissim al otro lado del simiteryo, i ke dospues, la va akompanyar a
la salida.
A la fin, mos fuimos a tomar un kafe komo es la tradisyon. Yo, estava muy emosyonada. Me dyo un telefon, ama nunka kamino.
Asta agora, esto muy emosyonada en kontando esta istorya. Para mi, era un andjelo ke me embiyo mi madre kon el Sinyor grande, Barehu Baruh Shemo.
