Keridos lektores, verso la fin de este teksto vos va dar la razon porké eskriví sovre esta tema.
Muncho fue eskrito sovre la destruisyon i la devastasyon ke rezultó de la Primera Gerra Mundial, ke desho milyones de muertos, miles de mutilados i una jenerasyon devastada. Para akeyos ke no bivyeron o vyeron una gerra, la grandura de las peryitas es realmente inimajinavle.
Para una muy grande parte de la povlasyon Djudia de la Evropa, la gerra sinyifiko una ajitasyon sosyal i fizika. El fronte oriental, ande la Russia lucho kontra la Almanya i Austria, fue una katastrofa i se paso en el sentro de la vida Djudia de la Evropa. El atako ruso se izo verso la Galicia austriana; los almanes i los austrianos atakaron la Polonya kontrolada por los rusos, etc. Kuando las armadas enemigas pasaron las frontyeras entre eyos, teniyan una koza en komun: el odio i sus disgustos por los Djudios.
Todos los partidos de la gerra pensavan i diziyan ke los Djudios estavan ayudando el enemigo. En la Rusiya tzarista, syenes de miles de Djudios entraron a la armada rusa i fueron mandados a las frontyeras, a los kombates. Malgrado esto, la povlasyon Djudia fue akuzada de fuyir el servisyo militar, lavorar kontra el Tzar, de azer karaborsa, kontrabanda i apoyar al enemigo. Se organizaron muchos atakos, pogromes kontra los Djudios i de otra parte, komunidades Djudias enteras fueron deslodjados de sus kazas serka de las fronyeras i mandados aryento de la Rusya i afilu asta la Sibirya.
Los Djudios en Almanya i Austria tambyen fueron prontos a la yamada patriotiko a las armas. Malorozamente, aki tambyen, el governo no teniya konfiyensa en eyos, i tomó syertas mezuras kontra los Djudios. En 1916, el Estado Mayor alman ordeno el Judenzählung, un kuento de soldados Djudios destinado a determinar si los Djudios estavan partisipando a sus doveres nasyonales. Los rezultados amostraron ke los Djudios serviyan en el fronte en proporsyon a su povlasyon i eran onestos i dedikados. Ma, komo de uzo, los rezultados ke se filtraron al publiko, diziyan el kontraryo!
Mas de la destruksyon de las komunidades i las difikultades ekonomikas, el rezultado mas terivle de la Primera Gerra Mundial fue el fakto ke los sospechos sovre la povlasyon Djudia en tyempos de gerra rezultaron en la kreyensa ke los Djudios eran responsavles de ke los alemanes perdyoron la gerra (los Djudios fueron akuzados de azer empesar la gerra kon un intento de dominasyon mundial i esto fue uzado en la propaganda Nazi) i de orkestrar la revolusyon bolshevika ke troko la Rusya en la Unyon Sovietika.
Es de saver ke, en la Almanya i Austria kaji 100.000 Djudios fueron enlistados en la armada i 12.000 de eyos fueron matados durante la gerra. Por la Rusya, no ay chifros egzaktos. Ma se save ke mas de 100.000 Djudios muryeron o fueron asasinados durante la gerra i los atakos anti-Bolshevikos. De otra parte, no mos olvidaremos ke no solo en estos dos paizes, ma en el Imperio Otomano, en la Ingletierra, en la Fransya, i afilu en syertos paizes arabos, syenes i afilu miles de Djudios partisiparon a la gerra i syertos peryereron la vida por sus patrias. La prova es muy serka: en los simeteryos militaryos Turkos, Fransezes i Inglezes ke se topan en Çanakkale puedesh ver tombas de Djudios.
Deke eskriví sovre esta tema? La Primera Gerra Mundial empeso el 1 de Agosto de 1914, i esta data era un dia de Tisha B’Av, i komo de uzo, yo perkuro de eskrivir sovre los evenementos del mez koryente.
