En la istorya de los djudyos el dia el mas dolorozo i triste es Tisha-be-av. Despues de sesh dias de Tisha be av se fyesta el “Tu be av”, un dia de felisita, ke es el dia del amor.
Esto mos mostra ke, mizmo en los dias los mas areskuros i difisiles no kale peryer la esperansa, kale syempre kontinuar a kreer ke ay un Dio, i ke la ayuda i la salvasyon vendran del Dyo poderozo. Esto todo mos akodra ke una mueva puerta se avrira i los evenementos se van a mejorear.
Desde los tyempos del sigundo Templo, el 15 del mez de Av fue selebrado komo una fyesta popular, se fyestava kon ermandad i amor, sin diferensya de klasa, ni de rikeza. Era en mizmo tyempo la epoka ande se arekojiya el fruto de la vinya kon bayles i kantes. En este dia, las mansevikas de Israel, enteramente vistidas de fostanes blankos emprestados de las unas a las otras para no averguensar i arebashar las ke no teniyan poder i se ivan a las vinyas para baylar. Munchos espozoryos se realizavan en este dia de fyesta.
Los mansevos viniyan de todas las partes, eskojiyan una ijika ke les plaziya sin saver nunka si era rika o prove. Mano kon mano en este diya de fiesta, los bayles kontinuavan diya entero. Los ke estavan viendo de las alturas de la montanya de leshos, este ermozo tablo paresiya buketos de flores blankas ke aviya kresido en el kampo.
“Mansevo! No mires a la rikeza ni a la ermozura, todo es vanedad. La ermozura pasa i la rikeza se bola, mira a la alma de tu kompanyera, es lo mas emportante”. Espozoryos, bodas, amor i alegriya nasiyan en este diya de Tu Be Av ke se izo diya de fiesta de los amorozos.
“Sesh akontesimyentos pozitivos se realizaron en el 15 de Av, azyendolo sitar komo diya de festividades en el kalendaryo Djudio”.
Kualo sinyifika Tu Be Av?
Tu Be Av, tradisyonalmente marka la fin del enverano i de las fyestas Djudias del anyo. Syendo el 15 del mez, es nochada de lunar, komo uzamos de dizir “La Luna en kinze”.
Una semana mas antes, Tisha be av mos izo akodrar muestra istorya trajika. La Luna en 15 de Av, es dicha simbolizar la transformasyon del dolyo en alegriya.
Desde los tyempos Biblikos, el 15 de Av fue selebrado komo fyesta de amor i kerensya. En Israel moderno, es una manera de “St. Valentine’s Day", komo el 14 de Febrero. Naturalmente, Tu Be Av es muncho mas ansyano i se selebra kon mas sobriedad.
En este dia se uza mandar a la kerida un buketo de trandafilas koloradas. A traverso el paiz, se organiza partis, se kanta kantikas romantikas.
En desparte, para los djudyos, Tu Be Av es una data popular de angajamyentos i proyektos de kazamyentos.
Tu Be Av, bueno para todos, Pas i Alegriya en los korasones.
