Kero empesar para darvos haber ke un livro ”El Prensipito” fue publikado. Fue publikado en Judeo-Espanyol / Ladino kon el apoyo de la Union Evropea. Es la ovra “Sivil Düşün” kon la presidensia de Melek Özlem Durmaz ke realizo este proyekto. El nombre del proyekto es “El Prensipito-Küçük Prens, En las linguas de Anatolia”. Una de las kondisiones es ke este livro no se puede vender. I avlando kon la sinyora Özlem Durmaz me propozo de distribuir estos livros. I le dishe ke puedemos dar a los ke eskriven en Djudezmo en el Şalom i en El Amaneser. I si mos keda mas livros los puedemos dar el diya del DIDL Internasyonal del Ladino. El livro fue eskrito por el famoso eskrivano fransez, Antoine de Saint-Exupery. El livro tyene los desenes trasados por el Eskrivano Saint Exupery.
Esta fin de semana en las islas tenemos “Los diyas de los livros ke fueros eskritos por los eskrivanos Adalis”. En este diya los eskrivanos van a firmar sus livros. Muestro amigo, Yakup Barokas ke bive en Israel i ke era el redaktor del semanario Şalom i ke es el otor de tres livros i uno es sovre sus rekuerkos de chikes i de su manseves sovre la Ada va estar prezente. El diya de Shabat va tener una entrevista kon el, en el Park Çelik Gülersoy ke se topa en el Çınar. En primero esta aktivitad tenia lugar en el Muzeo de las Islas ke se topa al lado de Yıldırım. Esto muy kontente de azer esta entrevista. I el sinyor Viktor Albukrek ke es el otor de un livro sovre sus rekuerdos de la Büyükada se va topar aya para firmar sus livros. La Fondasion de las Islas esta organizando una aktivitad sovre el eskrivano Ermeni, Mıgırdıç Margosian. Reelmente en la Izla Büyükada tenemos un alay de aktividades kulturales mizmo si syertas personas dainda estan kontando “ke diyas biviamos en la Büyükada 30-40 anyos antes! No so de la mizma idea i kreo ke oy en diya se esta organizando dyes vezes mas de aktivitades kulturales. 40 anyos antes no se organisava nada. Puedeser unas kuantas ekspozisyones o unas kuantas konferensias en el Anadolu Kulübü…
Antes de eskapar mi artilkolo devo de partajar mis kondoleensyas a la famiya Almelek porke pyedreron a sus padres i marido, Yakup Almelek ke era un ombre de kultura. Esto no es valable solo por el sinyor Almelek ke era el otor de una pyesa de teatro ke fue djugada en Brodway en New York. Reelmente todos los miembros de la famiya Almelek son personas de kultura. Sus ija, Sibel antes de irse a Smirna era direktrisa del Muzeo Djudio. Ester, su mujer tenia una Galeria de Arte i eskrivio buen karar de artikolos de arte por el Şalom. Alper, su ijo es un artisto. El solo djuga buen karar de pyesas o djuga para dar a entender syertos sujetos. Yakup Almelek, ke tu alma repoze en Gan Eden. I pasensia a la famiya Almelek.
