Estamos en una edad muy elegante. Agora tenemos todo lo ke keriamos fina setenta anyos: No mos estamos indo a la eskola, ni al echo, tenemos moneda ke mos da el governo kada mez, i tenemos una kaza ermoza. No semos ovligados a entrar a kaza en una sierta ora. Munchos dentre mozotros tenemos permision de konduizar i mezmo un otomobil privado. La djente de muestra edad no tienen espanto de murir, porke ya semos bastante viejos. Alora, la vida es ermoza! Mas emportante de todo, semos entelijentes i ekspertos de la vida. Puede ser ke muestro meoyo esta mas teshido porke esta muy yeno. De dinguna manera no semos bovos, solo tenemos de pasar mas muncho tiempo en aziendo muestros echos nesesarios. Ay munchas kozas akumuladas en muestro meoyo ke, por sierto, esta aziendo presion a la oreja interyor. Por esta razon, a vezes, tenemos problemes de oyer lo ke mos estan diziendo. Es komo si el disko de una komputadora esta lavorando mas avagar kuando esta yeno de archivos. No es ke muestro meoyo se aflako, solo es ke esta yeno de muncha enformasion. Dizen ke la djente de muestra edad, al momento ke entran a sus kazas, se akodran ke no se fueron a todos los lugares ande devian de ir. O no mos akodramos ande metimos esto o akeyo. No es un problem de memoria. La natura solo mos ovliga a kontinuar a azer, a lo manko, mas munchos movimientos.
Todos los ke son mas aedados de setenta anyos kale ke se mantengan kon zarzavates, frutas, salatas, muezes, guevos, pishkado i karne (unas kuantas vezes a la semana), i azete de oliva. Kale ke mos forsemos a olvidar tres kozas, muestra edad, el pasado i dar keshas. Tres kozas kale ke seygan emportantes para mozotros, amigos, penserios pozitivos, i una kaza sin bruido i kon musafires. Tres kozas kale ke agamos mas muncho, riir, egzersizes fizikos (ma solo a muestro ritmo), pasar mas muncho tiempo kon amigos (no solo kon la famiya i paryentes). Siete kozas son esansieles: No asperar a tener sed para bever agua. Bever agua mas munchas vezes al dia. No asperar a tener esuenyo. Kale durmir sufizamente. No asperar a estar kansado para repozar. Repozar kuando ay tiempo. No asperar a azerte hazino para azer un egzamen medikal. Ir al doktor regularmente para un kontrol jeneral. No asperar mirakolos divinos, no pedrer konfiensia en nada, i pensar ke todo se va azer mas bueno.
