Esta semana vos kero kontar unos kuantos rekuerdos ke mos kontava mi papa. Dizen ke las mujeres kontan 50 anyos rekuerdos de sus pariduras i los ombres kontan 50 anyos rekuerdos de sus askerlikes. Mi papa no eskapava de kontarmos sus rekuerdos un poko amargos de sus askerlikes.
Despues ke eskapo su askerlik normal ke sureyo 3 anyos, kon un amigo suyo avriyeron un ateliye de enkachar livros (mücellit). En 1941, dainda sin ke sus echo se aresente, un diya en kaminando en la kaye lo aferraron los jandarmas i lo yevaron a un lugar ande estavan arekojendo los ombres non-muzulmanes. No tuvo ni tiempo de dar haber a su famiya. En el kamino rankontro una mujer konosida i le enkomendo ke les de haber a su famiya para ke no keden en kudiado. Los jandarmes teniyan orden de arekojer a todos los non-muzulmanos de 23 a 40 anyos. En muy kurto tiempo en Estanbol kedaron solo los ombres aedados i kriyaturas. En supito las mujeres, en vezes kon bebes i kriyaturas chikas, kedaron en medyo el mundo sin paras. Las madres i esfuegras ampesaron a mirar las kriyaturas i las mansevas ampesaron a irsen a lavorar. Aviya munchas mansevikas ke no teniyan edukasyon de eskola i akeyas se ivan a lavorar en las kazas.
Mi papa mos konto ke del lugar ande se arekojo tanto mansevo los metyeron a los trenos i los yevaron a Trakya. Kuando abasharon del treno vieron un kampo vedre vedre, kon un riyo chiko koryendo al lado. Estavan muy kontentes. Eyos ke se aserkaron del kampo en supito akeyo vedre se bolo al aver. Porke esto de vedre ke vieron eran saltapikos vedres (çekirge). Kedo una tierra seka tutun. No aviya otro remedyo, los metyeron a kavakar la tierra i fraguar kaminos. De este riyo chiko beviyan agua i se lavavan. Todo el tiempo ke estuvieron en este “dizeremos askerlik” no se kitaron los postales i los vistidos de ensima de eyos porke las noches viniyan los chakales i se los arovavan. Todos los de aya estavan piyojentados i despues de un poko de tiempo ampeso la malarya. Por esto las ermanas o las madres de estos ombres les trayiyan ajos kon sakos. Kada demanyana i noche komiyan de estos ajos i ansina se salvaron de la malarya. Entre estos askeres aviya en vezes padre i ijo, o tiyo i sovrino o dos tres ermanos endjuntos.
Mi padre mos kontava la provedad ke uvo en este tiempo en Estambol. Aviya djente ke bushkavan kozas de komer aryentro los chopes. Por esto mi padre mos enkomendava ke en mundando las patatas o las fasulyas, ke las mundemos un poko mas godras. Por ke estas mujeres, lo mas aedadas, tomavan estas kashkaras, las lavavan las buyiyan i kitavan el kuero i komiyan lo de aryentro.
Mozotros semos una jenerasyon muy mazaloza ke no vimos este modo de provedad. No mos olvidaremos ke akel tiempo ni las komunitas no teniyan bastante posibilitas finansiyeras. Esto ke vos konti era 80 anyos antes, kolay al meldar.
Kuando se eskapo este ginnam i tornaron a kaza, mi papa mos konto ke afuera de la kaza lo dezvistyeron, i todo lo ke se kito lo echaron pishin a la soba i lo kemaron kon los piyojos endjuntos.
