“Ay tres modos de shofar” dizen los savyos:
El shofar kasher, el shofar medyo kasher, i el shofar enteramente non-kasher.
El primer es el shofar ke sona un ombre atado a su ley, akumplyendo las mizvotes i savido en la manera de sonar el shofar en un kuerno tomado de un animal, syen por syen kasher. Esto es la figura del judio kumplido.
El shofar medyo kasher se puede entender ansi, ke es una persona ke se siente judio sin muncho atamiento a su ley i sus tradisyones, komo si el tomava el kuerno de un animal non kasher i sonava en este shofar emprestado.
El shofar non kasher del todo es la figura del judio asimilado, refuzando la kreensa de sus padres i pensando de una manera filozofika i realista “Yo kreyo en lo ke veyo, lo ke es lojik, i no en estas leyendas antiguas i tradisyones ke oy no tienen mas sus razones de egzistir”. El shofar de esta persona no es kasher siguro i siguro ke su kondukta es leshos del judaizmo. Ma un diya el shofar non-kasher le akodrara el verdadero sensyo de su judaizmo, ke lo kera u no, son las trompetas de los pogromes, de la enkizisyon, de la shoa, de las persekusyones kontra muestro puevlo, de los kampos nazistos de la muerte, la trajediya moderna del “Vel d’hiv” i de todos los antisemitizmos modernos i antiguos ke sonaron en muestras orejas, Sarsaneyando al non-kreente ke se alesho de su ley i de sus ermanos judios. Es la trompeta ke le grita kruelamente a sus orejas sin piyadad. “Espertate judio asimilado i torna a tu puevlo ijo de Avraam, ke lo keras o no, sos judio, sona el shofar derecho i no te espartas de tu puevlo!”.
