Ya vos konti la otra vez, ke la muzika traye a los puevlos lado kon lado. Oy vos kero kontar sovre el bayle ke se yama Tango ke nasyó en Argentina. El Tango empeso en los anyos 1865-1880 kuando los emigrantes proves vinyeron de Espanya. Es un bayle ke tiene aryento la desepsion, el espirito kombativo i un poko la melankoliya. El instrumento del tango es el Bandoneon ke fue inventado por los Almanes. La koreografiya del Tango en los anyos de 1917 en Argentina lo baylava i kantava el artisto Carlos Gardel. En la shena kantava las kantikas del Tango kon la vistimyenta Smoking. Por esto kon tiempo i los rikos empesaron a sintir estas melodias i baylar. I en el siglo 20 se izo moda el Tango en la Evropa kon los artistos Argentinos.
Despues ke se fundio la Republika Turka, i aki se izo moda el Tango. Los kompozitores Turkos Necip Celal, Fehmi Ege, Necdet Koyutürk empesaron a kompozar Tangos kon palavras en Turko. I los kantadores i artistos Secaattin Tanyerli i Yaşar Güvenir kantavan estos Tangos una maraviya. La djente se namorava de oyir, i baylavan el Tango. Los Tangos ke se kompozaron akeyos tiempos vinyeron fin agora i se kantan oy tambien. Komo “Sevdim bir genç kadını”, “Sana nerden gönül verdim”, “Dinle sevgili dinle”. La mueva jenerasyon komo Dilek Türkan i Şevval Sam tambiyen kantan Tangos. El grupo LPS “Los Pasharos Sefaradis” tiene un CD entero de Tangos ke se yama “Tangos del Dip del Baul”.
Kuando mos fuimos a Sud Amerika, vimos i sintimos este muzika i bayles de Tango. En Buenos Aires ay una parte ke se yama La Boca ande ay kazas de Tango ke se yaman Milonga. Aya puedesh ver asentados en un kafe o en komyendo en una lokanta vienen i baylan los artistos de las kayes. Las Milongas en los anyos del 1800 se fraguaron por los lavorantes proves de los vapores. Trayiyan a las kazas boyas i boyadeyavan las kazas kon estas boyas. Por esto oy en dia las kazas de La Boca son de diferentes kolores, komo en akel tiempo.
Siguro ke ir fina Argentina i no ver un Show de Tango no puede ser. Por esto una noche mos fuimos al teatro ke se yama Tango Porteno ke era en la kaye mas grande de Buenos Aires i tambien del mundo ke se yama Avenida 9 Julio. Estava muy grande i maraviyozo el teatro. La dekorasyon estava komo Art Deco muy enteresante. Kuando vos vash puedesh ver el Show en komyendo o no. Pasimos aya 2 oras komo en los esfuenyos.
En dizyendo Argentina vos kontare lo ke pasimos ayi. Buenos Aires i Argentina son muy grandes. La Gastronomiya se konose kon las karnes asadas ke azen. Una noche mos fuimos al restorante Kosher para komer karnes asadas. I un diya mos fuimos a una Granja ande biven los Gaucho’s. Se yamava Fiesta Gaucha. En la puerta mos resivieron los Gauchos en dandomos Empanadas. Empanadas es la spesyalidad de Sud Amerika. Es komo filikas kon sarsicha o kon kezo. Despues empeso el Show de los Gaucho’s, komo se bayla i se kanta en la Granja, i tambien baylaron Tango. Despues pasimos a la lokanta para komer las karnes asadas ke se konosen en el mundo entero i ke son muy savrozas.
