Antes munchos anyos, kuando era chiko, avlavan en Izmir kuando entrava el mez de Elul. Dizian, “Ya empesan los ayres de Selihot". Djustamente en Izmir en estos tiempos asoplava el “İmbat”, un ayre muy ermozo. I muestras madres lo yamavan “ayre de Selihot”.
Me akodro ke las noches en las kazas organizavan Selihot. Mi padre, de bindicha memorya, estava komo Hazan muncho tiempo. Kuando me ize mas grande i empesi a meldar en la sinagoga, me envitaron tambien i a mi para meldar.
El Selihot era muy demprano. A las oras tres de la manyana empesavan a meldar los “piyutim” ke son las kantes. I despues, el hazan de el Selihot meldava el “Kamti” i la djente empesavan a kantar. Unos kantes se meldavan en Ladino i otros en Ebreo. Ke ermozo era kuando el hazan meldava en Ladino “ke tu derecha la espandida para resivir a los ke tornan en teshuva” i todos entendiyan lo ke estava meldando el hazan. Los ke vinian a el Selihot ombres i mujeres meldavan, kantavan i tambien yoravan porke se emosyonavan. Oy malorozamente los ke vienen para Selihot no konosen el Ladino i no pueden konoser este plazer.
Los hazanim meldavan kon munchos makames komo Sazkar, Hicaz, Hüzzam, Nihavend, Mahur i otros. Era grande plazer de oyir el Shofar entre el Kadish i esto era el sinyal ke estavamos eskapando. Despues de Selihot se meldava “La Tefila” i despues era tiempo de esperar ke la sinyora de la kaza apronte la meza para el desayuno. Boyos, borekas, ojaldres, burmas, fritadas, guevos roshos haminados, subya (un beveraje de kueshkos de melon) estava ordenado en las mezas. Los ke avlavan en Franses kontavan kozas en Ladino ma mas muncho en Franses.
En Turko ay una dicha ke me plaze muncho. “Geçmiş zaman olur ki hayali cihan değer.” (El rekuerdo del pasado vale un mundo.) Kuando me akodro de estos dias me estrecho ke akeos dias mas no van a tornar. Ma se kere mirado a el futuro i embezar a nuestros keridos de nuestra tradision para fondar un avenir mas ermozo.
Estamos aserkando a el dia de Rosh Ashana. Es tiempo de rogar de todo bueno. Vos sueto una anyada buena kon salud, kon prosperidad, kon ganansya, kon alegria, kon pas en el mundo i en la tierra santa de Yisrael, amen.
Ke empese el anyo kon sus bendisyones, amen.
Tizku leshanim rabot neimot vetovot.
