En 1955 dainda yo era chika, estavamos en Septiembre dainda en la kampanya en Yeshilköy. Las eskolas akel tiempo se avriyan bastante tadre, komo verso la fin de Septiembre.
Mi papa teniya la botika en Karaköy. El avriya su botika kada demanyana a las syete, kon sus manos. Diziya ke es “bereket”. No dava las yaves a los lavorantes.
En Yeshilköy moravamos en la kaza de una profesora de la eskola lokala, Fitnat Hanım. Esta kaza teniya una guerta muy grande i teniya un perro muy salvaje, ke se yamava Bidjik. Este perro era atado los diyas i las noches lo dezatava la patrona para ke no pueda entrar dinguno. El perro tanto salvaje a mi ni a mi ermanika no mos aziya nada. Lo fishugavamos i el estava muy orozo. Akel tiempo en las kazas no aviya telefones, ma ande Fitnat Hanım ya aviya. Eya no era kazada, morava kon su madre. Era tanbien miembro del partido, “Cumhuriyet Halk Partisi”.
El diya del 7 Septiembre mi papa komo kada demanyanika se alevanto demprano i se fue kon treno a Sirkedji i de aya iva kaminar a Karaköy.
Mozotros moravamos kon mi granpapa, el padre de mi mama, ke era bivdo. El teniya la botika de vistimientas en Eminönü djusto enfrente del gishe de biyetos de piyango, Nimet Abla. Agora ya no egziste mas porke derokaron todas las kazas de aya, para engrandeser la plasa de Eminönü. Mi granpapa se iva un poko mas tadre al echo.
La demanyana de 7 Septiembre Fitnat Hanım la yamo a mi mama, dizyendo ke mi papa esta telefonando. Shema Israel! Mi papa deke estava telefonando demanyanika? Pishin suvyo mi mama ande la patrona, mi papa le disho ke no mande a mi granpapa a Estanbol. Ma mi granpapa ya se aviya yido. Al pareser ke la botika de mi granpapa la aviyan echo siniza. Todas las ropas las izieron migajas, los vistidos los arazgaron. Las vitrinas las rompyeron. No vos puedo dizir el shok ke tuvo mi granpapa, ke no se vino en si por semanas. Mi papa konto a mi mama la dezgrasya ke vido en los kaminos.
Viniendo en Yeshilköy, al lado de muestra kaza morava una famiya de Behar. Madam Behar era una mujer aedada. En supito vino en yorando i gritando a la puerta de Fitnat Hanım en rogando ke la eskonda. Eya morava en Edirne en su chikes i en los evenimyentos de Edirne aviya bivido las dezgrasyas de aya. Eya teniya orejales en las orejas ke los berbantes las aviyan arankado de sus orejas en arazgandolas. La madre teniya un aniyo ke no le saliya del dedo, le aviyan rompido el dedo para tomarselo. Yorando se fue ande la patrona muestra i se eskondyo debasho la meza en tremblando. Mozotros serrimos todos los pandjures de la kaza i la patrona libero el perro de su kavena para protejar la kaza si viniya alguno de afuera.
Ma bendicho el Dio no mos akontesyo nada. Todo el danyo fue en una noche. No me esto akodrando komo mis paryentes tomaron este kavzo. Ma la Shena de Madam Behar tremblando i yorando no me la va olvidar nunka.
