Kada anyo los miembros de ka Komunidad Djudia d'Estanbol fiestan el empesijo del muevo anyo Ebraiko. Este anyo estamos fiestando el muevo anyo 5784. Mizmo aparejar la Halila del muevo anyo es un echo emportante para los rabinos ke aparejan todas las oras de Kabalat Shabat; fin de Shabat; oras de las fiestas. Todo depende del sol mizmo si tenemos oras diferentes en muestro payiz, oras de invyerno i de enverano. Ay anyos ke la Halila es aparejada, imprimada i distribuada por el Şalom. Todos saven ke realizar la Halila es el dover del Gran Rabinato i de la ovra de la Kisba Gemilut Hasadim.
Todas las ovras de la Komunidad lavoran para azer regalos i para azer kartas para la fiesta. I esto es un revenido emportante para las ovras.
Ay anyos ke el Şalom embiya livros a los ke keren embiyar a sus paryentes o a sus amigos. En el Şalom puedesh topar la lista de los livros promosyonados.
Ya savemos ke se organizan pransos de Pesah, sederes en las dos partes de Estanbol. Ya se ke ay agora en la partida Asiatika un muevo restoran ke da komidas Kasher i ke es kontrolado por el Gran Rabinato de Turkiya. Puedeser deven de organizar pransos de Roshashana. Kreo ke oy en diya es bastante karo de aparejar pransos para 20 personas. Se puede organizar en restoranes asemejantes i kada famiya paga su parte. Ya savemos ke muestra Komunidad es muy tradisional i las fiestas Djudias son emportantes para la grande partida de los Djudios turkanos.
El Şalom una semana antes de Roshashana i la semana de la fiesta aparese kon munchas ojas. La semana pasada fue publikado kon 28 ojas. Los miembros del Şalom lavoran para resivir bastantes publisidades. I los botikaryos emplean esta fiesta i este Şalom para ke los Djudios de muestra sivdad sean sus klientes i ke merken de sus botikas. Todos estos botikaryos saven ke si los Djudios empesan a emplear de eyos, sus echos se anchean. I kuando se avla de una palavra kontra eyos guayy…
Oguro una anyada buena i alegre yena de salud i kon echos buenos a todos los miembros del Şalom, a todos los dirijentes de muestra komunidad i a todos los lektores del Şalom. Viernes a la tadre i Şabat a la demanyana todas las keilas son avyertas i son prontas a resivir todos los yahides ke keren rogar i keren resivir la anyada mueva. Shana Tova!
