Estamos en el mez de las fyestas.
Rosh-Ashana es un prinsipyo de una anyada mueva ke kontyene: muevos ideales, muevas reushitades, muevos problemes kon muevas solusyones, i lo mas emportante: muevas relasyones kon muevas amistades.
Kada prinsipyo es una esperansa. Ke seyga una anyada kon un avenir muevo i valorizaremos muestra vida verso los preseptos de muestro Dyo.
Kero avlar un poko de las uzansas de Rosh-Ashana.
Por egzempyo; en las dos noches de Rosh-Ashana, kuando se vyene del kal a kaza; se dize el Kidush. En primero se kome el dulse de mansana ke sinyifika ke este anyo muevo va ser dulse del empesijo fina la fin.
La prasa semboliza ke los enimigos ke keren muestra maldad, ke se despareskan.
La espinaka es el simbolo de lo ke dizimos por muestros inimigos: ke los ke keren muestra maldad se aleshen de mozotros.
La datile ke se kome semboliza ke todas las negreruras ke tengan fin de agora endelantre.
La kalavasa es la sinyifikasyon de todos los zahutes ke azemos.
El peshkado semboliza la azlaha, la abondansa i el pujar. Ke muestros zahutes ke pujen komo el peshkado.
Una de las uzansas emportantes es ke se kome la kavesa del peshkado o de la gayina. La sinyifikasyon es ke syempre estaremos a la kavesa de todo modo de akontesimyento en muestra vida.
Avlando de las uzansas me akodri de una tiya (zihrono livraha) ke mos kontava konsejas i evenementos i rekuerdos ke se aziyan en las fyestas.
Komo por egzempio se tomava una kanata yena de agua, i se metiya delantre de la ventana afuera enriva de la garnitura de la ventana.
Esta kanata noche entera tomava las luzes, las ermozuras, las buendades ke viniyan del Dyo i al otro diya toda la famiya deviya de lavarse la kara kon esta agua bendicha, yena de ermozuras, para ke el anyo entero pase kon sanedad i dingun mal kon felisita.
La sigunda noche para pueder meldar la beraha Sheeheyanu, en la meza kale ke ayga una fruta mueva ke no se komyo fina oy. Esto es la uzansa i la fruta es la agranada. Los granos de la agranada sembolizan las mitsvot ke desidimos de azer en el anyo muevo.
Rosh-Ashana es el kumpleanyo del universo.
Desde el ultimo Rosh-Ashana asta el presente, komo valorizimos este regalo de vida ke el Dio mos dyo?
Ande estamos en la relasyon kon mozotros mizmo, kon muestra famiya, kon muestro entorno, kon muestro Dyo? Para pueder avansar, ké pasos devemos de dar?
Despues de dizir el Kidush spesyal de la fyesta, el pan, la Halla ke se aze redonda, diferentamente de lo habitual, se unta en la asukar u miel i se aze Hamotsi.
Despues se komen las komidas preparadas por la balabaya kon grande savor.
SHANA TOVA i HAG SAMEAH keridos lektores.
