Un grupo de mujeres estavan entrando a las kamaras de gaz. Dos mujeres se aserkaron de una de las prizonieras, apanyaron su manto, i se alesharon de aya. En las aldikeras toparon djoyas de oro, i platas. Ma el manto dainda estava pezgado. Bushkaron en todas las partes. Ke ven! En una aldikera eskondida, un bebe estava durmiendo. La una de las mujeres le disho a la otra: “Yo no tengo ijos, i ya so demaziya de vieja para tener kreaturas. Toma todo el oro i la plata i deshame yevare este bebe a mi kaza”. I ansina fue, la mujer se yevo el bebe. El marido estuvo muy kontente de tener una kreatura.
La engrandesieron a la ijika komo si fuera sus propria ija, ma nunka le disheron ke no era sus ija. Pola eskapo sus estudios, i empeso a lavorar komo una doktoresa de kreaturas en uno de los mas grandes ospitales de Polonya.
Unos kuantos anyos despues, la madre de Pola muryo. Una semana duspues, una mujer vino a la puerta, i le disho: “Kero ke sepas ke la mujer ke se muryo la semana pasada, no era tu madre”, i despues le konto komo la toparon. En primero, Pola no se kreyo a la mujer. “Kuando te topimos, yevavas un ermozo kolar de oro kon una eskrituria en ebreo. Vate i bushkalo” le disho. Pola presto fue a mirar entre las djoyas de su madre. El kolar estava aya. Pola yoro dias i dias, ma ya saviya ke no aviya remedio. Se lo metio el kolar, i mas no se lo kito de enriva. Duspues de unos kuantos mezes, Pola mas no penso a sus raizes judios. En un viaje ke izo al etranjero, Pola konosio dos mansevos de Lubavitch. Pensando ke esto puediya ser una oportunidad para topar sus raizes, les konto la estoria, i les amostro el kolar. Los mansevos le disheron ke esto es un nombre judio. Le konsejaron de embiyar una letra al Rabi de Lubavitch. Pola embiyo una letra al Rabi, i resivio una repuesta diziendo ke es seguro ke eya es judia. El Rabi le konsejo de enstalarse en Israel. Aya pudiya topar sus raizes.
Pola se enstalo en Israel. Empeso a lavorar en un ospital ande konosyo un mansevo doktor. Un tiempo despues, se kazaron. Anyos duspues, en el agosto del anyo 2001, uvo un atako teroristo al Cafe Sbarro en el sentro de Yerushalayim. Pola estava kaminando serka de aya kon su marido. Los dos ayudaron a yevar los ferridos al ospital. Kuando arivaron al ospital, Pola rankontro un viejo. Estava bushkando su inyeta en todas partes del ospital. Pola lo kalmo. Le demando al viejo komo la iva konoser a su inyeta. El viejo le dio la deskripsion de un kolar de oro ke su inyeta yevava. Entre los ferridos, la toparon a la inyeta. Kuando vido el kolar, Pola le demando de ande lo aviyan merkado este kolar. El viejo le disho ke el lo izo este kolar. “Anyos antes ize dos deyos por mis dos ijas, ma mi otra ija la peryi en la gerra”.
Es ansina ke Pola lo topo a su padre.
