Kuando aze luvya, munchas amigas se keshan, a la izla no le yakisheya luvya, se keshan i dizen oy ay luvya, no ay mar, ke se va azer?
Es djusto ke en las izlas no ay munchas kozas de azer, sovre todo kuando aze luvya. No ay un salon de filmos, no ay sentros komersyales, no ay lugares serrados i si ay mezmo no tyene savor.
A mi no me emporta, por empesar, komo me plaze djugar kartikas me vo al klup i djugo kanasta.
Sovre todo en los diyas de luvya es una oportunidad para eskrivir seya artikolos para la revista, seya piesas de teatros. La luvya ya kedo ma ay una freskura i esta ennuvlado; es muy ermozo dospues de la luvya la golor de la tyerra. Esta manera de diyas, de vista avro la komputadora i me me meto a eskrivir.
No me esto kreyendo ke a la vejes, me ize jurnalista i esto parvinyendo a topar tantos sujetos. Los primeros tyempos tomava diksyonaryos, lo meldava syen vezes para no azer yerros. Agora ya esto mas pratik i no me esta vinyendo keshas de la kerida editora Karen Sarhon, kijo dizir ke ya me ize buena eleva. Te rengrasyo Karen ke me provokates a eskrivir, esto muy kontente de tener una pajina ke me apartyene. Kuando tomo alavasyones, me antusyasmo.
Oy va azer un poko de anunsios de la mueva sezon. Ya es ora de arekojermos i ya es ora de implementar las aktividades ke estan asperando en el kashon.
Al 12 Novembre vamos a fyestar komo kada anyo el Avrupa Yahudi günü. (EU DIYA ENTERNASYONAL DE LA KULTURA DJUDIA).
Un diya yeno de aktividades i por siguro a la fin del diya vamos a reprezentar una boda djudiya muy elegante.
El primer anyo dishe una boda djudiya a ken enteresa, no me imajini ke iva ser tan enteresante para los ke no son djudyos. A la fin de la boda vinyeron allado de mozos i mos demandaron miles de demandas. Aviya elevas de eskolas relijyozas, universitaryas ke estan aparejendo tezes de doktora, tomando notas i travando fotos.
Si el Dyo kere, este anyo vamos a djugar un teatro para selebrar el 21en Anyo de la fondasyon de GOLDEN AGE, kon syertos djugadores de teatro del DOSTLUK YURDU DERNEĞİ, agora mos nombramos “AMIGOS PARA SYEMPRE.
Este grupo semos lokos i bolados para djugar teatros. Komo aziyamos kada anyo uno u dos teatros, semos auzados a reunirmos, tomamos muncho plazer de estar endjuntos i veramente mos keremos muncho byen. Komo so yo la ke los arekojgo, un poko si kedi tadre ya empesan:“Forti ke estas azyendo, ayde ya mos eskarinyimos”.
Apenas eskrivo al grupo, vini tala ora, ya estamos empesando, todos ya estan prontos.
No me demandan kualo es? Ke rolo tengo? No mos difera, el rolo esta poko, esta muncho, solo estaremos endjuntos i por siguro azeremos mitsva.
Inshalla dospues de los yamim noraim, vamos a empesar seryozamente a las provas.
Vos asperamos a todos vozos, kreygo ke vash a kedar muy kontentes.
Vos sueto una anyada buena kon sanedad, kon parnasa tova i kon todos djustos.
SHANA TOVA UMETUKA.
