Asta ke me kazi, mos ivamos a Yeshilköy los enveranos. Despues ke me kazi, mi marido ke se iva a las izlas, me las alavo muncho i dishimos, aprovaremos. El primer anyo, la primera semana kuando se aziya areskuro, me suviya unas kongoshas. Porke kuando se iva el vapor dalkavo me paresiya ke estamos blokados en la izla. Kon tiempos ya me auzi i agora esto muy oroza en la izla. Kuando abashavamos a la sivdad i ampesavan los friyos, mis ijikas ke eran dainda chikas, yoravan ke keriyan irsen a las izlas atras porke aya era kayente. Ya les diziya ke agora es invyerno i en las izlas esta friyo, ma a ken avlas? Eyas estavan siguras ke las izlas son siempre kayentes.
Yeshilköy era un lugar muy kalmo i silensyozo. Antes moravan munchos judios. No aviya kal aya, en las fiestas mos ivamos al kal de Bakirköy. El kal de Bakirköy era komo una kaza. Abasho morava la famiya del shammaz i ariva era un kaliziko muy agreavle. Kada uno ya teniya su lugar de anyos. No se si se merkavan los lugares. Todos mos konosiyamos. Aviya munchas kriyaturas. Ya abashavamos abasho a la guerta del kal para djugar, despues suviyamos ariva, mos deskansavamos, de muevo abashavamos abasho, las eskaleras eran de tavla, en abashando i suviendo tanta kriyatura ya vos imajinash el bruido ke saliya. El mas ermozo diya en el kal, para mozotros las kriyaturas era Simha Tora. En kaminando las Sefer Toras echavan bonbones ensima i mozotros las arekojiyamos, ken i ken va tener mas munchos bonbones.
Los selihot era otro rituel. Los ke teniyan araba, komo el sinyor Mario Gabay, Sinyor Efraim Boton, pasavan por los ke keriyan partisipar a la orasyon, los tomavan i se ivan todos endjuntos al kal de Bakırköy. A la torna los tornavan a kaza de muevo. Se dezayunava en las kazas de los ke se ivan al selihot. Era kon sira. Se aparejava muncho bueno. Boyos, bulemas, biskochos, chay, kafe, kezos, dulses i mas. En estos pransos de dezayuno se avlava de la ley, de la Tora, lo mas.
En las fiestas despues de la salidura del kal, mos ivamos ande una prima de mi papa, la Tant Suzan ke morava al lado del kal. Mi papa eran munchos ermanos, kada uno teniya dos-tres kriyaturas, i eya teniya dos kriyaturas la mizma edad muestra. Todos los primos endjuntos estavamos muy orozos.
Estos rekuerdos inosentes mos keda en una kyoshe de muestros korasones ke no se olvida nunka i kuando se akodra mos traye una sonriza a las karas.
