Kreyer i Kerer son dos byervos muy importantes en muestras vidas.
Un dia el hodja enriva de su azniko se estava indo a su kazal. En el kamino vido unas personas ke estavan asentados en basho, i se yanasheo allado de eyos, i les demando, ken es el grande de aki? Se alevanto un vyejo barvudo i disho, so yo. Le demando el hodja deke estash aki asentados, ke estash azyendo? El vyejo le respondyo, en el kazal muestro no kedo agua i la tyerra se seko. Empeso sekedad, por esto vinimos a azer orasyon al Dio para ke aga luvya. Peki, disho el hodja, chadir ya tomatesh allado? Deke, disho el vyejo. El hodja disho, para ke no estesh mojados, para protejarvos de la luvya. No, disho el vyejo, no tomimos chadir.
Agora disho el hodja, vozos no vos kreyitesh ke va azer luvya, si kreiyash ivash a tomar un chadir allado. Por esto la orasyon vuestra no se si la va akseptar el Dio. I en el kazal miyo no tenemos agua, i yo sali a azer orasyon al Dio para luvya ma tengo allado chadir.
I en riyendo se alesho de aya para ir al kazal suyo, i kuando entro a su kazal empeso la luvya.
Keridos, kuando vamos a kerer una koza en primero kale kreyer, ansi ke al 25 de Elul es YOM KIPUR i vamos a salir delantre del Dio, para azer orasyon, de vidas largas, para ke mos pardone de lo ke izimos, para ke mos de salud, sanedad, azlaha, i parnasa. Para KERER esto todo en primero kale KREYER...
Anyada buena kon sanedad i kon todos endjuntos.
SHANA TOVA - TIZKU LESHANİM RABOT VE HATIMA TOVA
