No hay dingun dubyo de ke New York tiene la komunidad Djudia la mas grande afuera del Estado de Israel, kon una povlasyon de mas de un milyon i medyo.
|
Anyo |
Povlasyon Djudia de New York City |
|
1654 |
24 |
|
1750 |
300 |
|
1850 |
16,000 |
|
1859 |
40,000 |
|
1880 |
80,000 |
|
1920 |
1.600.000 |
|
1950 |
2,000,000 |
|
1981 |
1,100,000 |
|
1991 |
1,027,000 |
|
2002 |
972,000 |
|
2012 |
1,100,000 |
|
2022 |
1,600,000 |
A parte de esto, kaji 2 milyones de Djudios biven en el doredor de New York City, ke se yama “New York Metropolitan Area”.
Ma, ken fue el primer Djudio a yegar a New York? Asta la semana pasada, yo saviya ke eran los 23 Djudios de Brazil. Ma al pareser no era djusto. En kada dia mos ambezamos kozas muevas!
El primer Djudio a yegar a New York era un ombre, ke se yamava Jacob Barsimson. Los istoryanos mos dizen ke Barsimson fue dezinyado por los lideres Djudios de Amsterdam para viyajar a New Amsterdam (ke se iva azer New York) para echar un ojo i ver si era konvenivle komo refujyo para la imigrasyon Djudia, despues de la kayida del Brasil olandezo. Salyo de Amsterdam el 8 de Julio de 1654 i arivo a New Amsterdam el 22 de Agosto de 1654. Él viajó kon dokumentos ke lo identifikavan kon la Kompaniya olandeza de las Indias Oksidentales, i ansi el governador de New Amsterdam, Peter Stuyvesant, malgrado ke era un antisemito bien konosido, no pudo azer nada kontra Barsimson.
23 Djudios de Recife, Brasil, arivaron al porto de New Amsterdam en Septembre del mizmo anyo. Es de saver ke fue en Recife ande se establesyo la primera Sinagoga de las Amerikas, Kahal Kadosh Zur Israel. Los Djudios de Recife aviyan fuido de la enkizisyon portugeza i aviyan pasado al Brasil olandezo, ande estavan protejados por la libertad relijyoza. Despues de emigrar a New Amsterdam, reusheron a fondar la primera komunidad Djudia en las tyerras ke se ivan azer los Estados Unidos de Amerika. En realidad, estos 23 Djudios arivaron a New Amsterdam despues de un aksidente en la mar. Stuyvesant izo todo en su poder para defenderlos de bivir en esta sivdad, inkluido Barsimson, ma los proprietaryos de la koloniya, la Kompaniya olandeza de las Indias Orientales, refuzaron la demanda de Stuyvesant de ekstradiar estos Djudios. Barsimson i Asher Levy, uno de los 23 imigrantes de Recife, fueron los lideres de la nasyente komunidad Djudia de New York para obtener las libertades relijyozas. La prova de sus reushita se puede ver en este kavzo. Kuando en 1658 fue prezentado una akuzasyon kontra Barsimson i se le ordeno de apareser delantre del tribunal un dia de Shabat, el djuzgador lo adjorno el djuzgo para otro dia al lugar de kastigarlo: un sivdadino tyene el derecho de no partisipar a los djuzgos en un dia sagrado para el!
Es de verdad koza de ver lo ke arivaron a azer los Djudios de New York durante los ultimos 369 anyos.
