Unos kuantos anyos antes, el Rey de Espanya lo envito al Grande Rabino de Israel, Rav Yonah Metzger. La razon de la envitasion fue komemorar el 800’ten aniversario de la muerte del famozo mediko, filozofo i talmudisto, Maimonides. Maimonides nasio en Kordova, Espanya. Durante la seremoniya, el Rav le prezento al Rey una medalia de plata muy larga i torsida kon la korona del rey gravada enriva. El Rey egzamino el Shofar kon kuriozidad i le demando kualo es su orijin. El Rey le demando si este shofar proviene de Afrika. La respuesta fue "No, el shofar es de Israel’’. El rey kijo saver para kualo sierve esto. El Rav utilizo esta konversasion para akodrarle una istoria problematika de los judios. El rey lo estuvo oyendo kon kuriozidad.
-Su Majestad, kreygo ke este regalo mos va permeter a eskapar muestra desepsion kon la istoria. Kinyentos anyos antes, kon la ekspulzion i la engizision de vuestros antepasados Fernando i Izabel, los judios espanyoles entraron en un periodo oskuro. Los judios ke estavan kompletamente entegrados en este pais, fueron ovligados a abandonarlo, ser kemados o kedarsen aki kon la kondision de konvertirsen al katolisizmo. Los judios ke kedaron aki, yamados marranos, se komportaron komo katolikos ma kontinuaron a bivir en akordo kon la Tora. Ensendiyan las kandelas de Shabat aryento de los almaryos para ke la luz no briye. Diziyan las orasiones a boz basha. (La orasion Kol nidre se resita por sus memoria). Ma tenian un problem en Rosh Ashana. Komo sonar el shofar? Un direktor de orkestra ke en realidad era judio izo un plano muy orijinal. Propozo al rey i a la reyna ke eran muy enteresados en la muzika, de organizar un konserto kon todos los enstrumentos ke se tanyan en asoplando. Esta propozision fue akseptada kon grande plazer. El shef ke desido ke el konserto seyga en Rosh Hashana, izo el program. El dia del konserto, el rey, la reyna i todos los novles se asentaron en las primeras siras. Los Marranos se mesklaron kon los miembros del publiko i se asentaron en las siras dalkavo. Todos los enstrumentos se tanyaron kon sira. A la fin, el direktor les prezento un kuerno komo el enstrumento el mas antiguo del mundo. Kuando el direktor empesó a sonar el shofar, los marranos asentados en las siras dalkavo resitaron estas dos orasiones a boz basha:
DIO SANTO, SENYOR DEL MUNDO, TU NOS BENDIZITES I MOS IZITES OYER EL SHOFAR, MUESTRO GRANDE I SANTO DIO, GOVERNADOR DEL MUNDO, GRASIAS PORKE MOS ESTAS MANTENIENDO BIVOS I MOS TRUSHITES ASTA ASTE DIA.
El shef sonó el shofar komo en la Alaha i todos se estuvieron kayados i aplodisaron muncho.
“Oy, Su Majestad”, kontinuo el Rav, “estamos aki de muevo despues de 500 anyos”. Esto muy kontente de tornar a Espanya, kero remersiarvos en el nombre de mi puevlo. Oy, mi puevlo ke bive en vuestro paiz esta puediendo gozarse de sus libertad, aziendo las fiestas i sonando sus shofares en las sinagogas renovadas. Grasias al Dio, puedo presentarvos oy este shofar sin ser ovligado a eskonderme’’.
El rey aksepto el regalo kon grande plazer i disho: "Gran Rabino, resivi munchos regalos enteresantes del mundo entero, ma este es un simbolo istoriko i esto apresiando muncho esta istoria i el shofar.
El Rav disho ke kere azer una orasion por el rey. Los dos se alevantaron. El Rav serro los ojos i alargo sus manos asta la kavesa del rey i resito su orasion. Kuando avriyo los ojos, lo vido al rey yorando sin nesesidad de guadrarlo.
