Antes ke mos vayamos a Viena, me estava imajinando esta sivdad kon palasios, kon su arkitektura i kon los kompozitores de muzika komo Mozart i Strauss. En abashando del avion me enkontri kon esta sivdad linda ke me imajini. Si el sujeto es Muzika, no vos va kontar la estorya, los muzeos, la djente, ni las kayes de Viena. Solo vos kero kontar sovre la muzika del paiz. Komo se save los mas importantes kompozitores son Mozart i el rey de lss Valses, Strauss. Mozart nasyo en Salzburg en el anyo 1756. Kuando era chiko empeso a djugar el piyano i el violon. Kuando teniya 17 anyos lo tomaron al palasio para ke aga muzika. Bivyo malorozamento fin 35 anyos. Fin estos anyos kompozó Operas, Senfonias i Requiemes. I el otro jenio de la muzika ke biviya en Viena i ke es la marka de Austria era Strauss. Las Valses ke kompozó Strauss oy en diya sen oyen kon muncho plazer. Kon esta muzika ke tiene el ritmo de 3:4 se bayla la Vals. Los kuples se abrasan komo sisnes, i se aboltan azyendo sirkulos. Es un bayle muy famoso. La vistimyenta es muy shik. Los ombres visten Frak i las mujeres fostanes largos. En el siglo 19 empeso en Viena esta moda. En los anyos 1812, esta muzika empeso en la Inglaterra por los aristokrates. I en los Balos estavan baylando este bayle en kantando esta musika.
Akeyos anyos en el Imperio Otomano, III.Selim era Sultan. Lo tomo al palasio por profesor a Hamamizade İsmail Dede efendi. Kuando vinyeron los reyes kon los musikantes endjuntos de Austria le demandaron al Sultan, ande vozotros no ay muzikas en este ritmo i en forma de Vals? Le dyo repuesta el Sultan, si komo no. Ya tenemos. I pishin lo yamo a Dede efendi, i le disho, azemos una kantika en esta forma komo la Vals de eyos. I el kompositor Dede efendi kompozo la kantika ke se yama "Yine Bir Gül Nihal" en el makam Rast i kon el ritmo 3:4 de Vals.
En fin vos rekomendo ke aprontesh una pasta ke se yama en Viena "Sacher Torte" ke se aze kon shokola i marmelada de kayisi, tomá allado un kafe kon leche i meté una muzika de Vals, por egzempio El Danubio Blu ke kompozó Strauss, serrá los ojos i empesá a kaminar en las kayes de Viena.
