Komo ya savemos, Joshua Bell es un mansevo judio. El es un grande virtuoz de viyolon i uno de los mijores direktores de la orkestra amerikana. Kero partajar kon vozotros el eksperimento muy enteresante suyo. El, gana a lo manko 60.000 dolares de kada konserto suyo. Sus konsertos los da en las mas grandes i famozas salas i salones. Tiene munchos oditores. Joshua poseda un violon Stradivarius ke data de 1713. Este violon vale agora 3.5 – 4 milyones de dolares.
Esto dicho, un diya del anyo 2007, Washington Post disho a Joshua Bell: Ven azeremos un eksperimento sosyal. Un diya en las oras ke todos salen del echo i toman el metro para irsen a kaza, da un konserto en la sala de algun metro, veremos kuantas paras vas a ganar? Joshua Bell aksepto, le vino muy enteresante esta propozisyon. Eskojeron la estasyon “L’Enfant Plaza” en New York. Porke los ke moran por aya son un publiko ke aman el arte, la muzika.
Sovre esto una tadre, Joshua djugo su violon i dyo un konserto muy alavado. Una noche antes en el konserto ke dyo, los bilyetos eran vendidos a 100 dolares el uno. Ma en este konserto de en medyo de la djente lo ke gano era solo i solo 32 dolares. Vos puedesh kreyer? Solo 32 dolares.
Esta diferensya proviene en fakto, del pozisyonamiento. El marketing es un proseso i no es un rezultado. La djente vos konsidera asigun la valor ke amostrash. Sigun la observasyon de akel diya, vieron ke lo mas de oyentes eran las kriyaturas. Eyas se kedaron enkantadas delantre de Joshua Bell, admirandolo ke estava djugando kon amor i tambien su performansa de la muzika perfekta.
