Sukot esta chafteyando muestra puerta. Despues de los diyas de djuzgamientos de Yamim Noraim, Sukot es una de las mas alegres fiestas de muestro kalendaryo, ande el biervo Simha (alegriya) es repetado tres vezes. Tresera fiesta de pelerinaje, se puede yamar tanbien fiesta de la rekolta, de un sensyo spiritual el Otonyo de muestra vida. El biervo suka siguro kere dizir tenta, kabana ke mos raporta a la fraza de la Tora “Tres diyas te asentaras en la suka komo los izo asentar a los ijos de Israel a sus saliduras de ayifto. Es el viyaje de Ramses a Sukot, es el viyaje de 40 anyos en el dizyerto asta el arivo a Kanaan. I las Sukas eran el abrigo pasajero para guadrarsen eyos i sus kodreros del sol kemador. Sukot tiene una valor numerika de 91, se dize ke es el shifro de los dos shifros reunidos del Sinyor Del Mundo. Sukot es una fiesta de igualdad, ken entra en la suka chikos, grandes, proves, rikos, viyejos i mansevos, i ya savemos ke en la suka kada noche 7 USHPIZIN, 7 grandes spiritualidad ke se aresiven en siertas komunitades en dizyendo “Baruh Aba”: Avraam Avinu ze raaya tov (su espoza) Avraam i Sara, Yitzhak i Rifka, Yaakov i Lea, Moshe, Aaron, David i Yosef kada uno patron de su Sefira de buendad, de djustisya i otra. La Suka teniya mezmo un sensyo spiritual muy profondo. A kada uno de los padres de Israel se adjusto 7 lideres, 7 chobanes, Jeste, Shemuel, Shaul, Eli, Amos, Stefania, Edesias, i dizen el Mashiah. La Suka tiene munchos sensyos de umildad, igualdad, proteksyon divina, kon sus pechos aviertos al ayre i a la luvia, komo dos paredes, un braso abrasando a sus ijos. En la suka estamos en los brasos, en la proteksyon del Dio Santo, muestros pekados fueron perdonados en Rosh Ashana i en Kipur, i agora estamos en la Suka en pas i ermandad, en sigurita komo un fetus en la tripa de su madre. Deshamos syete diyas muestras kazas de piedras i marbro para entrar en una morada pasajera, komo muestra vida pasajera, komo muestra rikeza i muestro poder. Todo pasa, todo soplo, todas vanidades komo dize el Kohelet (Eclesiaste). Una de muestras 5 Megilotes ke meldamos en sukot eskritos por el rey Salamon, la suka es un MAKIF (un serklo) ke mos enterna i mos da fuersa i union. Daremos el senso mistiko de la Kabala ke este biervo es una valor, una fuersa eksterior ke mos entorna i mos influensa kon biervos simples. Avlaremos kon ambiyans, es una atmosfera partikular, un serklo eksterior ke mos entorna, mos yeva, mos alevanta, mos transporta. La fiesta de Sukot tiene munchas klasas, en la tefilas dizimos siempre “espando ariva de mozotros la suka de pas” es para el mundo entero, la prova es ke aviya en el tiempo del Bet Amigdash una seremoniya de azer Korban, 7 diyas de sukot para todos los puevlos de la tierra. Kodreros, Vakas i Toros; el primer diya 13 Toros, el sigundo diya 12 i ansi 7 diyas; kada diya el nombre de los Toros abashan asta 7. Los kodreros, vakas i otros kedan mizmo, lo ke mos amostra ansi ke la salvajeriya de los puevlos kontra de Israel va abashar i va azer pas i armoniya entre los puevlos. Un diya, en el avenir todos los puevlos ajenos diran “Vini todos endjuntos, suveremos al Monte de Siyon i rekonoseremos el Dio de Israel”. Esta prezentasyon de los korbanot amostra munchos sensyos spirituales de las tres fiestas de pelerinaje, es la fiesta ke se topa solo en el Judaizmo. Pesah, Shavuot se fiestan tanbien en el mundo kristiano. En avlando de las fiestas de Pesah, Shavuot i Sukot me vino al tino un midrash enteresante ke vos kero kontar. En el tiempo de la revolusyon franseza, los revolusyonares kijeron dar un nombre a sus revoltas i demandaron el ayudo de muestros hahamim, ke respondieron de una boka: Libertad, igualdad i fraternidad. Las tres fiestas son Pesah-Libertad, Shavuot-Ermandad, Sukot-Igualdad.
Avlaremos agora del sembolizmo de las 4 plantas de Sukot ke se prezenta delantre del Ehal: Etrog, Mytrus, Arava, Lulav ke reprezentan 4 modos de personas ma ke todas endjuntos forman muestro puevlo ke se sostienen uno kon otro i se kompletan. El Etrog asemeja al korason, tiene ermoza savor i ermoza golor, es komo el ombre ke estudia la Tora i kumple las mizvotes. El Lulav se puede dizir ke parese a la kolumna espinal, es de arvole tanbien i tiene ermoza savor ma no golor komo los ke estudian la Tora ma no azen mizvotes. El Myrtus (Adas) del arvole Myrth tiene buena golor i dinguna savor, parese al ke save la Tora sin azer mizvotes, lo asemejan al ojo. La Arava ke no tiene ni savor ni golor es komo la persona ke no se ambeza la Tora i ke no aze mizvotes. Kuatro plantas, kuatro modo de personas todas tienen de menester i se apoyan uno al otro, i todos endjuntos forman una komunita komo el buketo de estas kuatro plantas ke se trayen delantre del Ehal.
Sukot alegre kon union, amistad i amor ermanos keridos.
Nota: Las tres fachas de sukot las kontaremos en otra eskrita miya kon bueno.
