En la gazeta ‘Ekonomi’ meldi un artikolo sovre una analiz realizado por la fondasyon Sabri Ülker, por las uzansas de meldar livros de los chikos. Asigun los rezultados de esta investigasion: las kriaturas de agora estan mas muncho auzados, a los livros audio o livros elektronikos. El avizo bueno es ke, i a las kriaturas de oy, les esta plazyendo meldar livros. I a los padres tambien les esta plazyendo meldar livros a los chikos. I la uzansa de merkar livros un poko se troko. Se esta vendyendo munchos livros de kriaturas uzados. Este haber me plazyo porke, meldar es avrir un mundo en tu vida. Si una persona, si gana este uzo de chikes en su vida, nunka lo perye, no keda solo i no se apreta su korason nunka.
De otra vanda, en vezes esto sintyendo, kuando los padres tyenen munchas okupasyones, les esta vinyendo kolay de avrir un livro audio a los chikos i desharlos solos en sus kamaretas antes de durmir. Ama se estan olvidando ke meldar livros kon los chikos, tyene otras relasyones. Un chiko de tres, kuatro o sinko anyos, antes ke se ambeza meldar, se aserka a los ombros de sus padres, en vezes siente la palpitasyon de korason, kon la boz kalma ke melda el livro. Esto krea un aserkamyento i kayentor entre los padres i los ijos. Esto es una relasyon segura entre eyos. Es muy emportante “la relasion” en la vida de una kriatura para la vida futura.
En una analiz de Harlow ke izo en 1932 kon las maymunas Rhesus mos amostra: el, tomo unas kuantas maymunas muevas nasidas, las aparto de sus madres. Izo unas madres de kuklas. Unos solo de tel, unos solo de algodon. La kukla de tel solo le dyo a komer. La kukla de algodon nada no les estava dando. Las maymunas solo se fueron para komer a la kukla de tel i diya entero kedaron kon la kukla de algodon. Tomaron la kayentura del algodon. Kuando se espantaron, kuando estuvyeron debasho de un alto stres, ni komyeron ni bevyeron solo abrasaron a sus madres de algodon. Tambien se vido en unas investigasyones realizadas en los orfelinatos, unas kriaturas kuando no estan resivyendo amor ni abraso o unas palavras kayentes no se estan adelantando. Ni los meoyos de estas kriaturas no se estan developando. En el mizmo orfelinato, kriaturas ke tomaron amor i abraso de sus kudyaderos en el futuro se izyeron mas sanos. Estos chikos kuando se azen mas grandes, se kreen ke son adoravles, se pueden aserkar fasilmente a los otros, konstruyen sus relasyones sovre la baza de emosyones positivas.
Puedesh dizir de meldar un livro kitates esto todo de penseryos. Lo ke veyo es: el mundo den diya en diya se esta konstruyendo mas muncho enriva del elektroniko. En el entorno de una meza de famiya todos estan kon sus telefonos en sus mundos. Ama, una famiya se fragua debasho de un tejado de seguridad, kon amor, kon amistad, kon abrasos, kon sintir al de frente. I un ninyo tyene menester de atansiyon de su famiya para su desvelopamyento kognitivo.
