La ekonomista judia de los Estados Unidos, Claudia Goldwin resivio el Premio de Nobel de Ekonomia por su investigasion ke ayudo a entender el estado de las mujeres en el merkado de lavoro.
La profesora de Harvard, de 77 anyos, es la tresera mujer ke resivio el prestijiozo premio de ekonomia. El juri disho ke la profesora resivio este premio por darmos enformasion sovre los rezultados del estado de las mujeres en el merkado de lavoro. Su investigasion esta revelando las kavzas del trokamiento, tambien las prensipales orijines de la diferensia entre los dos jeneros.
En el mundo entero, alrededor de 50 por sien de las mujeres estan partisipando al merkado de lavoro en komparezon al 80 por sien de los ombres, ma las mujeres estan ganando manko i tienen mankas probabilidades de suvir los eskalones de la kariera profesional.
El juri disho ke Goldwin revizo los archivos i arekojo datas de los Estados Unidos, de mas de 200 anyos. Randi Hjalmarsson, un miembro del komite del Nobel disho ke Goldwin lavoro komo un dedektif i estudio datas ke munchas personas, munchos istorianos desidaron a no estudiar antes de esto, porke les paresia ke estas datas no egzisten. El juri aksentuo ke el lavoro de Goldwin amostro la primera eksplikasion sovre la partisipasion de las mujeres al merkado de lavoro i sus ganansias durante siglos. Goldwin obzervo ke malgrado la modernizasion i el dezvelopamiento ekonomiko i la pujita de mujeres en el merkado de lavoro, la diferensia de ganansias entre ombres i mujeres kontinuo durante muncho tiempo.
En la konferensia de prensa de la prezentasion del premio, el prezidente del komite del premio, Jakob Svensson, afirmo ke Goldwin ayudo a eksplikar deke las mujeres estan "muy poko prezentadas" en el merkado de lavoro, mezmo ke munchas de eyas tienen una mijor edukasion. Svensson, profesora de Ekonomia de la Universidad de Stokholm, disho: "Entender la situasion de las mujeres en el merkado de lavoro es emportante para la sosiedad porke las oportunidades de las mujeres en el merkado de lavoro dependen de una variedad de faktores, inkluzo la edad de la mujer, perspektivas de edukasion i maternidad, en lugar del dezvelopamiento ekonomiko i del trokamiento de las normas sosiales".
"Goldwin demostro ke la partisipasion de las mujeres en el merkado de lavoro no tuvo una tendensia para ariva durante esta perioda de 200 anyos. Los talentos de las mujeres se van en vazio si no tienen las mizmas oportunidades ke los ombres o si no partisipan en kondisiones iguales".
