La semana pasada kuando estava eskrivyendo mi artikolo reelmente se estava biviendo una desgrasia en Israel. Dos diyas dospues se bivio otra desgrasia en Gazza. Oy en diya los ke biven en Israel tyenen problemes muy emportantes. La mas grande partida son soldados o tyenen sus ijos/as o inyetos/as en el askerlik. Ya savemos ke Israel tyene una armada bastante poderosa. I esta armada tyene apoyo de los ex-soldados ke son una populasion bastante ancha.
La semana pasada estava siguro ke Israel devia de entrar a Gaza para mallograr todos los nidos de los del Hamas. Hamas no es el reprezentante del puevlo Palestiniano, ma kon su fuersa esta dominando todos los ke keren reprezentar el puevlo Palestiniano.
Oy noche de lunes la Armada Israelyana no entro dainda a Gaza. Porke mizmo los Amerikanos trokaron de idea i no keren ke 2 miliones de Palestinianos ke biven en Gaza abandonen estas tierras. Kreo ke Israel kere ke dos miliones i medio de Palestinianos abandonen estas tierras i Israel kere kontrolar kada punto de estas tierras. Dospues no se! Ma no es muy fasil ke dos miliones i medio de Palestinianos se vayan a otros payizes. I no se ken los va achetar. No devemos de olvidarmos ke dingun payiz no kijo los teritoryos de Gazza durante los tratamientos de Camp David. Porke era un teritoryo muy dangerozo. En el 1994 me fui a vijitar Gazza kon la primera ministra Turka, Tansu Çiller kuando vijito Israel i Gazza. Reelmente era muy fasil de ver la provedad ke estavan bivyendo. Trenta anyos antes no teniyan ni un kilometro asfalteado. Oy no se si tyenen mas munchas posibilidades. Ma malorozamente no se save ke Israel es el payiz ke ayuda lo mas a los Palestinianos. Ne tyenen ni agua, ni elektrisitad. I es Israel ke les da. Todos los ayudos pasan por la mano de los Israelyanos, mizmo si es los ayudo de otros payizes.
Reelmente mizmo si son enimigos del Estado Israelyano i de los Israelyanos deven de bivir en mijores kondisyones para ke una PAS se puede realizar un diya entre estos puevlos.
