Impresion, sol nasiente es un kuadro del pintor fransez, Claude Monet. Se puede dizir ke kon el nombre de este tablo, empeso el movimiento del “IMPRESIONIZMO”.
La primera vez ke esta ekspresion fue uzada, fue pejorativamente, por un kritiko de arte, Louis Leroy, despues de una ekspozision en el salon de artistas independentes de Paris en 1874. En este grupo estavan Pissaro, Degas, Renoir, Cezanne i otros sin ser famozos del todo. Estos artistos no kerian mas pintar temas istorikos, mitolojikos, relijiozos. Se kerian aserkar de la vida moderna de kada dia i obtener lo ke el ojo ve i el korason siente, de un modo kreativo. Asi pintaron diversos payzajes de diferentes perspektivas i senas familiales, kon un stilo rapido de kolores briyantes. Estos pintores, ke lavoravan jeneralmente en el ayre libre, mos amostraron ke se puede krear imajes diferentes en mirando a lo mizmo.
El movimiento impresionisto empeso a ser influente a partir de la segunda mitad del siglo XIX en Evropa i spesialmente en Normandia. Es un koriente artistiko, ke konsiste en una mueva reprezentasion de la realidad, ande la luz es el faktor el mas importante para alkansar a la ermozura de la pintura. Los pintores empresionistos, konstruyen sus kuadros direktamente kon manchas i puntos de kolor, sin mesklarlas en sus paletas. Es simplemente desinado kon la emosion de akel momento, sin azer planos, sin empleyar la razon. Monet dizia ke el pinta “komo un pasharo kanta”, instinktivamente. Es un movimiento istoriko, pozitivo i alegre, de “aki agora”, ke alivyana las ansias de la vida. Para entender bien este arte amable, se konseja de observar los kuadros de una sierta distansia, para ver mijor las luzes i las figuras.
A. Renoir dizia, “El impresionizmo elimino todas mis zonas sekas. Me izo yegar a la konkluzion ke antes no savia, ni pintar, ni trasar”.
El nombre de “impresionisto” se empleyo tambien para otros artes komo la muzika, la literatura, la arshitektura.
