El diya pasado de esta semana un elevo mato a su profesor kon kuchiyo. Esto afito en una eskola de Arras ke se topa en el norte de la Fransia.
El profesor Dominique Bernard ke teniya 57 anyos, era amado por todos sus elevos. El lavorava 24 oras sovre 24 para edukarlos. Para eksplikarles lo ke se ambezavan para ke no se olviden nunka, i amen lo ke se ambezan.
El atakante Muhammed, un elevo viejo del lise, era un Chechen de 20 anyos. El entro a las 11 la ora por la puerta prinsipala de la eskola Gambetta i topo al profesor Bernard i enfinko su kuchiyo a su pecho i despues al garon. Un otro profesor ke vido esta dezgrasya kijo vinir al lado de Bernard ma i el fue kuchiyado en la kara. No se arto de lo ke izo, se fue i atako a un lavorante de la eskola. Los elevos ke se topavan en akel lugar pishin yamaron la polisiya ke en 4 puntos ya ayego. Los polises lo aferraron kon una pistola de shok elektrika. A los elevos ke fueron testigos de esta matansina les dieron apoyo psikolojiko.
Tres anyos antes afito otrun asasinato en otra eskola, en estos mizmos diyas. El profesor Samuel Paty fue matado i despues kortado la kavesa por un otro kriminal de orijin de un payis de Rusya.
En los Estados Unidos mos akodramos de un loko kriminal ke entro a una eskola i mato tantos elevos, ijikas i ijikos chikos o adultos.
Estas lokuras las vemos i en la politika del mundo entero. Una persona o unas personas ke no keren ke biva el denfrente, o ke tenga un payiz para si, toma una arma i va matando salvajamente al ke le viene delantre. Sin mirar mujer, ombre o kriyaturas. Esto ke vos digo lo pasimos el Shabat pasado. En un kanal de TV un komentador disho ke los Israelyanos estan atakando komo ravyozos. Yo pensi ke una persona en estando en su kanton asentado no se aferra la ravya. Es si un perro kon ravya lo morye, ke se apega de esta hazinura serioza. Por esto kuando azen komentaryos kale ke avlen kon empatiya. Kale ke pensen, uno de los ke mataron ya si era un inyeto suyo. Estos ke entraron a las 6 de la demanyanika kuando todos estavan durmiendo i kortaron las kavesas de ijikos i bebikos, no teniyan ravya? Esto parese kuando dos kriyaturas se peleyan, el uno aharva al otro i el otro lo aharva al primer. Ma ven al ken aharvo dalkavo, i el es kastigado.
La gerra es una koza muy negra. Ke seya de esta vanda o de la otra vanda, los ke sufren son los siviles. I tanbien los soldados ke gerreyan porke todos son los “kodrerikos de sus madres” komo dizen en turko. Son padres, ijos, ermanos o maridos ke sus piedritas, meten fuego a las famiyas.
Yo nunka me kreyi en este slogan de “never again”. Mirá lo ke esta afitando en muestro dor 2023. No se perdona. El Dio ke este kon todos.
