Oy keriya eskrivir munchas kozas ermozas, las ermozuras de la vida, de las komidas sefaradi, ma malorozamente no tengo gana ni de tomar el kalem en la mano.
El 7 Oktobre mos kayo aryento de la alma un pedaso de lumbre, mos vino al garon un bulto i ni los byervos no kijeron salir de la boka. Kuando mos alevantimos, de sintir los haberes ke estan vinyendo de Israel, si no mos kayo gota es bueno. No mos viniya al tino esta manera un kavzo ke iva vinir, miles de personas se muryeron sin kulpa, sin pekado del terorizmo de Hamas. Grande, chiko, kriyatura, vyejo, no miraron, a ken toparon los mataron, los kortaron, los kemaron a los bebikos, i a munchos los fuyeron.
Kaji 3000 personas aviya a las 03.30 de la demanyana al lado de Gazza, aviya un festival i akel diya era Simhat Tora, las ivamos a baylar a las Sefertoras, no mos desharon ke lo gozemos. La primera koza kuando entraron de Gazza fue matar a las personas ke estavan en el festival, i dospues entraron a los kazales.
Dospues de la gerra de 67, 73 el mas grande atako izyeron los inimigos. Agora es de estar mano kon mano, no ay demandar deke, u komo kale ke estemos kon fuersa en pyes.
De ver los videos komo estan koryendo a los ospitales para dar moral a los ke estan feridos, de otra parte los haredis estavan trayendo komidas para los soldados,
los soldados estavan indo kon kara riyente, kon kantikas, i baylando hora. Este modo se gana las gerras, kon moral fuerte, i kon la enerjiya ermoza...
No kale peryer la esperansa.
