100. ANIVERSARYO DE LA REPUBLIKA

          2023 el empisijo de muestro muevo siglo.

          Estaremos orgulyozos. Mira lo ke pasimos!...

Estavamos eskrivyendo letras kon la mano.

Uzimos los daktilos para eskrivir. La boz del daktilo mos viniya al uyido komo la boz de la sivilizasyon.

Despues izimos el echo kon teleks; el teleks teniya una boz unika. Para telefonar asperavamos dia entero al lado del telefon.

Despues las novedades… E-mail, internet, telefonos mobiles ke los tenemos en muestra aldikera, en muestra chanta. Ansi es ke muestra vida se konosyo kon el mundo dijital. Fue una grande transformasyon.

La komunikasyon dijital mos yevara a muestro objektivo?

La emportansa de la kerensya, del respekto se va aumentar u se va diminuir?

            “Mustafa Kemal Ataturk”, el fondador de la republika, tyene palavras muy emportantes, i konsejos, rekomandasyones ke va enfluensar muestro avenir.

Unos kuantos:

• “Mansevos, sosh el futuro de la mueva jenerasyon ke se esta enaltesyendo. Mozotros fondimos la republika, es vozotros ke la vash a enalteser”.
• “Una nasyon ke no dessina, no aze statuas, no aze las novedades teknikas, akeya nasyon no puede avansar”.
• “Eduka los mansevos i la jenerasyon vinidera. Kale dar a los mansevos la siensya, la savidurya i la idea pozitiva. Es kon eyos ke alkansarash a la luz del futuro”.
• “En el kamino de la sivilizasyon, la reushita depende de la innovasyon. Para reushir en la vida sosyal, en la vida ekonomika, i en el kampo de la siensya el uniko kamino es el desvelopamyento i progreso”.
• “Pas en el paiz, pas en el mundo entero para la trankilita de los puevlos”.
• “Muestro verdadero mentor en la vida es la siensya i el desvelopamyento personal”.
• “Kale kreer ke todo lo ke vemos en el mundo es la abilidad de la mujer”.
• “Mi puerpo siguramente ke un dia se konvertira en tyerra. Ma la republika de Turkiya durara para syempre”.
• “Todos azeremos lo ke puedemos, i en el futuro azeremos las responsabilidades ke mos kayen enriva”.

            Kuando se anonso en 29.10.1923 la fondasyon de la republika de Turkiya, esto fue el grande trokamyento radikal de la istorya del paiz. Lo ke gano el paiz es, la ameliorasyon de la edukasyon, la ganansya de los derechos de las mujeres i el trokamyento sosyal.

El kambyo sosyal, i el laisizmo.

La relijyon i los empleos governamentales se separaron.

Los 10 derechos fondamentales ke vino kon la fondasyon de la republika.

• El derecho de bivir komo kale.
• El derecho de la salud.
• El derecho de la edukasyon.
• El derecho de las mujeres por votar i ser elejidas.
• El pensamyento, liberta de reunyon i manifestasyon
• Liberta de la relijyon i de konsensya.
• La privasidad de la persona.
• La immunidad de residensya.
• El derecho de la prensa.
• El derecho de pueder prezentar un dokumento al tribunal.

Estas novedades i trokamyentos son la vision ancha i el grande lavoro de “Mustafa Kemal Atatürk” ke era un ombre muy adelantado en sus ideas i todo lo ke izo fue por su pais.

Ke su alma repoze en gan-eden.