Heshvan, sigun el kuento de la Tora es el ochen mez del kalendaryo ke ampesa en Nisan. Su nombre es Mar Heshvan, komo todos los mezes judios, este nombre es tomado de la lingua de Babel ke trusheron los judios de Babilon. El Mar Heshvan dyo lugar a una falta ke MAR kere dizir amargo en ebreo. En la lingua de Babel tiene el sensyo de “gota” de luvya. En la realita, Mar Heshvan es un mez de aguas, de luvyas, de beraha i abundansya. En este mez kaye de los sielos el Yore, ke se yama Geshamey, luvyas de abundansya, de bendisyon. Luvyas ke arebiven la sekura de la tierra, trayen vida i poder a la natura i al ombre ke va sembrando. Es un dono presyozo del Kriyador sigun el Sefer Yetsira ke mensyonamos siempre. Mar Heshvan ke es atado a un Trivio, a un sensyo spiritual i a un sinyo del Zodiak. Ansi el trivio de este mez es Menashe, ijo de Yosef Atsadik i de su espoza Asenat, i es inyeto de Yaakov Avinu i ermano de Efraim de sinyo spiritual de “golor”, avlando siguro del perfum de la alma siendo ke las letras de Menashe komporta el biervo Neshama. Bien ke Menashe es el ijo grande de Yosef, Yaakov en su bendisyon a sus ijos i inyetos metio a Menashe despues de Efraim el chiko, siendo ke Efraim es el ke va luchar kontra la asimilasyon en el avenir. Estos dos mansevos, bien ke nasidos i engrandesidos en una atmosfera ajena, fueron elevados kon todos los prensipios judios i derechedad, i es ansi ke kada paryente judio biviendo en la Gola, auguran a sus ijos “ke puedash ser komo Efraim i Menashe”. Viniendo al sinyo del Zodiak, es skorpion.
Si avlamos demuevo de las luvyas bendichas, mos akodraremos sigun Raban Gamliel mos ambeza, ke las luvyas ampesavan a kayer despues del kinze de este mez, data ande los ke se ivan “aliya la regel” por Sukot tornavan a sus kazas i no teniyan espanto de ser mojados en kamino, dunke ya estamos entendiendo ke Mar Heshvan no es un mez triste. En Israel se aze bodas i evenimyentos alegres. Siguro ke mozotros aki aplikamos los prensipes de muestra komunita. En muestra istorya moderna Mar Heshvan komporta un evenimyento pozitivo ke ya konosemos. El 11 del mez de Mar Heshvan 1917, el ministro eksterior Britaniko, Lord Artur James Balfour, en su famoza deklarasyon Balfour, aviya dado al mundo judio el derecho de konstruir “un ogar nasional judyo”. Sigun munchos manaderos, la deklarasyon Balfour akodra el evenimyento ke tuvo lugar en A.J. 538, ande el Rey Sirius de Persya ke aviya konkistado Yerushalayim de la mano de Babel i aviya dado a los judios la posibilita i el apoyo de formar i fraguar demuevo el Beit Hamikdash. El evenimyento Balfour se konsidera komo el primer paso de muestro estado… En Mar Heshvan, otro evenimyento alegre, el 29 del mez ke se yama SIGB es un diya ande los judios de Ethiopia azen taanid i tefilot de perdonansya, es un diya ande se renuvela el berit (aliyansa) kon el Dio Santo, donde el manadero se topa en el livro de Nehamia, ande es kontado las seremoniyas echas por los judios ke aviyan tornado de Babel, seremoniyas ke se aviyan echo en el sigundo Beit Hamikdash, muevo konstruido. Oy, todos los grupos de mansevos fiestan este diya djusto 50 diyas despues de Kipur, es una fiesta ofisiala de Israel, se van de Armon Anatziv al Kotel Amaaravi i aya arogan i deklaran una vez mas, sus atajidos a la Tora i al Bendicho El. Kon Mar Heshvan ampesa el Otonyo i en la Medina kresen las rozas blankas Katzav ke travan kon su perfumo a las bizbas. El perfumo, pas (Shalom) i esperansa de diyas buenos i fin de la gezera, mos trayga repozo i pas, por las kualas estamos arogando kon todo muestro korason i guadrados de todo mal ke mos seya. Amen.
