Oy vos kero yevar a las islas de Caribes para kontarvos la muzika i los bayles de la Amerika Latina.
Kuando izimos el tur de los Caraibes kon el Cruise el mas grande del mundo ke se yamava "Allure of the seas" en abashando en el porto de la izla de Bahamas mos disheron bienvenidos la orkestra, kon la muzika Latina. Di ke estavamos en los suenyos. El aver estava komo Limonata, la djente komo shola, i la vista komo tablo de pintura. Desharemos la izla, tomaremos la muzika i el bayle Latino.
En primero si echamos un ojiko a esta muzika i bayle salyo el estilo de los genetes locales i kon los ke vinyeron aki para kolonizarla de la Evropa. I puedemos dizir para este bayle i la muzika ke es Hibrid. El mas importante ritmo i las muzikas son la Chacha, Bachata, Rumba, Merengue, Salsa, Calipso i Samba. Estas muzikas se kantan en Kuba, Jamaika, Republica Dominica, Puerto Rico, Meksika i Brasil ke son los paizes Latinos Amerikanos. Kuando oygo estos ritmos i la muzika, aryento del korason me bolan las maripozas. En vezes se bayla kon 2 personas, una mujer i un ombre i en vezes kon grupo se azen las figuras ke son muy ajil. El puerpo, las pachas, los pyezes son muy estetikos kuando baylan. Las vistimyentas paresen komo se visten en azyendo tango o si no flamenko, ma los fostanes de las mujeres son mas kurtos.
En Brasil, en Kuba i tambiyen en los otros paizes latinos la djente kuande oyen la muzika Latina pishin empesan a baylar i azer las figuras latinas ande estan. No les emportan ke estan en la kaza o en la kaye.
El mas konosido grupo de esta muzika es el "Buena Vista Social Club" i el solista "Ibrahim Ferre". En Jamaika el artisto de "Reggae" es "Bob Marley" ke se konose kon los kaveyos ke tiene "Rasta". En Puerto Rico la Salsa, en Trinidad & Tobago el Calypso, en Meksika el Mariachi i en Brasil la Samba son las muzikas i los bayles nasionales. Los instrumentos de esta muzika es la gitara, la trompeta, el piyano i el kontrebas. I por ritmo se toka el bongo, tumba, maracas i clavei. En vezes los vokales azen 2 o 3 bozes en kantando. Kuando vijitimos Rio de Jenerio en Brasil mos fuimos a la kaye ande pasan las eskolas de Samba en el Karnaval de Rio. Me vino muy kuryozo la kaye ande pasa el kortej. Porke oras i oras ke pasa el kortej baylando Samba todo todo era 800m la kaye entera. En los lados ay 2 tribunas para la djente para ke se asenten i ke veygan el show de las eskolas de Samba.
En fin komo kada vez vos rekomendo ke aparejes kon Rom, asukar morena, limon, menta, yelo espedasado i soda, azevos un Mojito, i en bevyendo este maraviyozo kokteyl metevos una kantika del artisto ke es el orijin de Jamaika Harry Belafonte ke lo yaman el Rey de los Calipsos kon la kantika "Banana Boat Show" i serra los ojos i empesa a kaminar en el bodre de la mar de los Caribes.
