Antes del invyerno vyene el Otonyo. Estambol pasa un Otonyo muy ermozo i romantiko. La natura se degiza de kolores a kolores. La kolor vedre del enverano ampesa a trokarse avagar avagar a kolores diferentes, komo kolorado, amariyo, maron i kayen enbasho, kaminamos sovre un tapet natural maraviyozo. Una de estas ermozuras las vemos a la ida de Polonezköy en Estambol. Me kedo enkantada i me maraviyo de ver las kolores vedres i maron i amariyo de todos los modos. Los tiempos kayentes del enverano ampesan a esfriyarsen. Los diyas ke pasamos en la natura en enverano ampesan a aminguarsen i ampesamos a entrar a muestras kazikas. Es un pasaje para el invyerno.
El Otonyo, si keremos avlar komo los filozofes, es tanbien una sezon triste. Se aserka la vida avagar avagar para la fin. Son los diyas dalkavo ke puedemos profitar. Ma es i una sezon de amor. Los amantes se van a los parkes, se asentan en los bankos, lado kon lado mano kon mano i kara kon kara. Se dizen biervos ermozos ke les viene de sus korasones.
Kuando se eskapa el enverano ampesamos a azer planos para muestras karyeras i puedemos konsentrarmos para las aktividades interioras. En esta sezon ampesamos a azer la konosensya de otras personas muevas, puedemos topar hobis muevos para mijorarmos.
Tanbien puedemos topar mas muncho tiempo para meldar livros. Puedemos toparmos kon los amigos i pasar tiempos agreavles.
La natura tiene de menester de luvias i inyeves para renovarse. Esta sezon de Otonyo es un aparejo de la natura antes las inyeves. Porke la inyeve es una kolchika para la tierra, ke no se enteze i ke no se entezen las semiyas.
Ayde antes de enserrarmos en las kazikas antes de la inyeve, profitaremos de esta ermozura i travaremos el aver puro a los pumones.
