Muestros savios mos dizen ke Sukot kijo dizir tanbien las nuves de santedad ke protejavan al puevlo de Israel en sus aventuras en el dizierto i siguro en sus saliduras de Ayifto. Muestra istorya mos amostra las tres fiestas de pelerinaje: Pesah, Shavuot i sovre todo Sukot kon sus alegriyas i sus periplos verso Yerushalayim. En el tiempo del Beit Hamikdash todos, chikos, grandes viniyan de las kuatro partes de Israel i tanbien de Babel kon sus kortejes de djentes yevando korbanot i Toros i en jeneral kaminando a pye, kon los aedados en las arabas, i el toro kon sus kuernos ornados de ojas de oro, kon los kantes las tefilot en un kamino penivle i largo kon sekanas, difikultades i kon grupos de djentes danjerozas.
Delantre de muestros ojos viene el tablo de los notables de Yerushalayim resivyendo a estos olimes kon biervos de amistad. “Vozotros ombres de kada vanda seyash los bienvenidos, Baruh Aba”.
Yerushalayim ya era aparejada de diyas antes, los depos de agua yenos, lugares para montar las tentas, prontas, limpyeza i orden se diziya ke no se viya mizmo una moshka bolar… Simha simha alegriya en kada punto i ora. En estos diyas se fiestava tanbien Simhat Bet Ashaova bazada sovre la agua, punto primordial de la egzistensya umana. Muestros hahamim mos dizen ke el ke no vido esta alegriya de Bet Ashaova no konoseran el sensyo verdadero de la alegriya del Beit Hamikdash. El sigundo diya de Sukot los Kohanim abashavan a Shiloa, un kazaliko al lado de Shiloan. Un rekurso de agua, (Shoava) saviya de ande se travava agua i se trayiya al Beit Hamikdash kon bayles i kantes… Al otro diya esta agua se vazyava enriva del mizbeah. De antes de este diya, de la nochada, en el kortijo del Beit Hamikdash se deshava grandes menorot, ke en kada menora aviya kuatro tasas de oro para la azete i kuatro eskaleras delantre de kada una, para ke los Kohanim mansevikos suvyeran i asendyeran las menorot, todas se aklaravan komo una kaverna de luzes i enkantos. Los notables teniyan torsas asendidas en sus manos i baylavan, kantavan, saltavan. En estas noches esfuenyo no entrava al ojo i Yerushalayim kedava espyerta noche entera. Los Leviim kon enstrumentos de muzika suviyan los 15 eskalones del Beit Hamikdash kon tefilot i kantes, afuera se asendiya fuegos i los chikos baylavan al torno de estas brazas kon alegriya diyas enteros.
Antes de eskapar de Sukot avlaremos tanbien de Oshana Raba, diya muy grande i santo. Ay ken dize ke es komo Kipur, syeten diya de Sukot. Mizmo en Rosh Ashana i Kipur, si no se afirmavan muestras rogativas, se afirmava en este diya santo i muestros pekados eran perdonados. En Oshana Raba se aze akavotes, se abolta en el entorno del ehal, 7 tornos, 7 padres de la ley kon el buketo de Lulav en la mano. Oshana kere dizir bozes al Dio santo. Ke mos de invyerno de pas, de repozo bueno, ke mos se apareje anyada dulse, Amen.
Enfin el Diya de Simhat Tora ke se kitan todos los livros de Tora, chikos i grandes, todos kon la Tora en los brasos, kantan i baylan. Se eskapa de meldar el livro de la ley i pishin se ampesa el Bereshit, la primera seksyon de muestro livro. La Tora no tiene fin. Es kontinual, el dalkavo biervo se eskapa kon “L”. L de Israel i el primer biervo de Bereshit, ampesa kon “B-V”, ke mos da el biervo LEV ke es korason. Amostra una vez mas ke la Tora esta en muestro korason asta la eternidad. El Dio no se kere espartir de mozotros i mos da otrun diya, ochen (8) diya despues de la Suka para estar a su lado, komo un padre ke no kere espartirse de su ijo kerido, i es el diya de Shemini Atseret.
Auguraremos vida i salud, entraremos kon bueno en diyas de Heshvan ke no es un mez negro, a la kontra es un mez de “Yore”, luvyas de beraha. Ke traygan prosperita i bendisyon a la tierra entera.
Sukot alegre, pas i amor a los reynados. Amen.
