Mi padre era un muy buen padre. No mos privava de nada. Bendicho el Dio tuvimos una muy ermoza infansia. Ma era un ombre muy seriozo. Teniya disiplina i prensipes. Lo ke diziya el, era ley. No puediyamos trokarlo. Por egzemplo lo ke viniya a la meza, kaliya komerlo porke akeya komida mos aviya mandado el Sinyor del Mundo. Esto no komo, akeyo no me plaze, no aviya. Si diziya no vas a salir, no puediyamos salir. I ansina munchas kozas.
A mi desde mi chikes no me plaziya patatas kochas. Me se apegavan al paladar i me trayiyan enguyos. Ma metazori me las komiya. Una noche la mama gizo patatas kochas, bezelyas i gayina. Yo dishe ke kero komer solo las bezelyas kon la gayina. Yo no kero las patatas. Ke pensash ke afito? Mi papa disho: No! En primero vas a komer las patatas, i despues vas a komer las bezelyas i la gayina. Esta noche El Sinyor Del Mundo mos dyo esta komida, i esto se va komer. Yo dishe ke no kero komer las patatas. “Alora, alevanta de la meza i vate a echar!” Esto era la repuesta de mi padre. Akeyas oras dainda estava muy presto para echar, ma me echi. No aviya remedyo.
La demanyanika me alevanti para ir a la eskola. Me lavi, me visti i me asenti a komer por la demanyanika. Yo ke veyo? Las patatas de anoche. Mama, kualo es esto? Tu padre me enkomendo ke vas a komer las patatas de anoche, no se pueden echar al chop. Yo no kero patatas. I akel diya me fui a la eskola ambyerta. A midi ya no estava puedyendo mas estar en la klasa de la ambre. Asperi kon kuatro ojos ke sone la soneri i ke mos vayamos a komer las komidas ke se topavan aryentro de los sefertasis ke mos kayentava Madam Ester. Kon grande alegriya me asenti a komer. Yo ke avro el sefertasi ke veyo? Atyo las patatas. Me vinyeron las lagrimas a los ojos. Ma mas no pude rezistir. Las komi kon grande savor porke ya estava para dezmayarme de la ambyertura.
Ansina es ke agora komo de todo. Kuando veyo los ke apartan los pirishiles de las komidas, me vienen al tino mis patatas. I estos meresiyan de tener un padre komo el miyo, me penso.
