Mi mama, la primera koza ke aziya despues de lavarse la kara, era bever un kafiko. Vos digo kafiko ma era un kafe dopio. Despues de midi lo tomava kon un unturyo al lado. Dizen ke el kafe aze peryer el esfuenyo, no se deke kuando tornamos de una boda o una okazyon de denoche, mos asentamos i bevemos un kafe para arepozarmos i despues mos vamos a echar i no mos se fuye el esfuenyo.
El otro diya meldi un artikolo ke me vino muy enteresante. Aki esta:
El kafe es la bevienda la mas konosida i amada. En el mundo entero se beve mas de 500 milyares de findjanes de kafe al anyo.
Sigun la leyenda, un diya un choban en Ethiopia vido ke sus kavras i kodreros se viyan muy orozos despues ke komiyan unas fasulyikas ke kresiyan en los kampos. En observando topo ke estas fasulyikas eran kozas buenas. De aya adelantre entro el kafe al mundo arabo. El nombre kafe viene del biervo arabo kahva. Los arabos beviyan esto al lugar de vino por ke el vino es defendido relijyozamente para eyos. Despues de tiempos el kafe se fue a la Italia. Ansina entro a la Evropa. En la evropa el kafe se ampeso a bever kon asukar i leche. El kafe se izo tan popular en la evropa ke munchas personas konosidas ampesaron a eskrivir poemas i kantikas sovre el.
En el anyo 1732, Johann Sebastian Bach eskrivio una opera komika kurta, sovre una muchacha a ken le plaziya bever kafe.
Ay una istoryika muy enteresante del Rey de Suedia, Gustav III. ke kreyiya ke el kafe no es bueno para la salud. Para provar su teza, se akordo kon su mediko i alkilaron dos personas. Al uno le dieron kada diya a bever kafe, i al otro le dieron ke beva chay. A vuestra idea ken bivyo mas muncho? En primero se muryo el mediko, despues se muryo el rey, despues el ke bevyo chay i despues el ke bevyo kafe!
El kafe mos da enerjiya, por esto kale beverlo la demanyana i no la noche antes de durmir. En una kupa de kafe preto se topa 113 miligramos de kafeina, en una kupa de neskafe ay 80 miligramos de kafeina i en una kupa de neskafe dekafeinada se topa 4 miligramos de kafeina.
En una kupa de chay se topa 40 miligramos de kafeina, en una kupa de shoko ay 18 miligramos de kafeina, en una kupa de kola ay 42 miligramos de kafeina i en una bevyenda de energiya se topa 70 miligramos de kafeina.
En muestro tiempo ay munchos kafes ke plazen a la djente. Les plaze asentar i azer moabet oras i oras kon una kupa de kafe. Por egzemplo Gloria Jeans, Kahve Dünyası i mas.
En turko tenemos dos dichas muy ermozas ke mos plaze a todos.
- Una tasa de kafe sera rekordada durante kuarenta anyos.
- El korason no kere ni un kafe ni una kafeteriya, el korason kere un moabet, el kafe es preteksto.
