Mosab Hassan Yousef, el ijo grande del fondador de Hamas, disho en una entrevista ke no lo sorprendio la brutalidad de Hamas durante el atako del 7 de oktobre. “Atakar el paiz el mas poderozo de la rejion. Komo no se imajinaron ke este atako iva avrir las puertas del infierno al puevlo palestiniano?”.
‘’El 7 de oktobre, mas de 2.500 terroristos del Hamas invadieron Israel por tierra, aire i mar, masakraron a 1.400 personas, la majorita siviles, tomaron rehen 230 personas, entre eyos 30 kreaturas. El mas chiko tiene mueve mezes. Famiyas enteras fueron asasinadas en sus kazas, i mas de 260 personas fueron masakradas en un festival de muzika’’.
"Desde su kreasion, Hamas tiene un objetivo: eliminar el Estado de Israel", disho Yousef. “No es un sekreto ke Hamas kere destruir el Estado de Israel. No pueden akseptar Israel, ni akseptar el derecho de Israel de egzistir”.
Este ombre de 45 anyos nasio en Ramallah i se esta akodrando la fondasion de Hamas en 1986. Yousef disho ke fue emprizonado en Israel durante mas de dos anyos. Disho ke mezmo en la prizion, Hamas torturava sus propios miembros. “Mataron i torturaron sienes de prizioneros. I aki es kuando empesi a demandarme: kualo va afitar si Hamas toma la direksion de Gaza? Munchos anyos despues, Hamas tomo el poder de Gaza. Su brutalidad no me sorprendio’’, disho Mosab Hassan Yousef.
"Kuando Israel reushe a abashar Hamas del poder de Gaza, los rezidentes palestinos van a selebrar i van a remersiar Israel por dar fin a su opresion i a su “ambision de poder’’.
“Devemos de separar el problem de palestina i el problem de Hamas. El buto de Hamas viene del abizmo del infierno i es nesesario de abasharlo del poder. Esto es mi mesaje komo eks-miembro de Hamas, komo el ijo de uno de los fondadores de Hamas, ya basta esto. Si no los detenemos agora, la proksima gerra va ser mas mortal i solo Dio save lo ke va vinir despues”.
‘’Desde mi chikez, estuve oyendo la estorya de Palestina, la istoria ke los israelianos izieron Gaza una prizion. Hamas no se esta okupando del futuro de las kreaturas. Yo so el reprezantante lejitimo de las kreaturas Palestinianas. No kero ke dingunos vengan i ke me digan ke Hamas esta gerreyando por las kreaturas palestinianas.
‘’La sosiedad de Palestina esta en las manos de Hamas i el ke esta de su lado esta partisipando a su buto. Hamas detuvo la evakuasion de siviles kuando Israel ordono la populasion sivil del norte de Gaza de evakuarla i ir al sur. Tenemos un problem prensipal i devemos de deshar de kulpar Israel. Si el mundo no kere konoser la realidad, ke se esten kayados es mijor. En las kapitales del mundo, miles de personas estan kaminando en gritando: “Palestina libre, Palestina libre”. Yo so Palestina i esto diziendo: ‘Ya basta Hamas’’. Ya basta a los lideres del governo ke estan matando muestro puevlo”.
El jurnalisto le demando si es posivle de derrokar la direksion de Hamas. Yousef le respondio ke no tienen otra opsion. “Oyeme esto: vamos a abashar Hamas del poder. Akodrate mis palavras. Los vamos a abshar del poder i los vamos a yevar delantre la justisia, i el mundo va ser testigo’’.
