Kuando salimos a los viyajes, antes de empesar el viyaje empeso a mirar en el internet o a los livros i ago el program de kaminar i tambiyen de Gastronomiya; ande ay Restoranes Kasher. Fin agora mos fuimos a 35 paizes i mas de 110 sivdades. En estos paizes topi diferentes Restoranes Kasher. Israel, Estados Unidos, San Francisco, New York, Fransya, Chekya, Ungariya, Hollanda, Beljika, Rusya, Argentina, Bulgarya i Turkiya.
En Israel, no se kere dizir 90% de los restoranes son Kasher. En el restorante EL GAUCHO o si no en WHITEHAL no me arto de komer karnes asadas.
En N.Y. ay munchos restoranes. El "T-bone Steak" ke komi aya dainda tengo la savor en el panadar. El sandvich de pastrami estava 10 numeros.
Kuando me iva a Paris i aya topava munchos restoranes Kasher. Mas muncho me plaziya irme a los Kabapchis o restoranes de karne. Tomo una Antrekot asado kon patatas fritas i una salata. Eyos te trayen 3-4 mezelikes; me avro un bokaliko chiko de vino; ke keyf ke tomo en komyendo.
Una vez kuando me fui a Chekya kedi kuryozo. Kuando demandi en Chekya kantos Djudyos biven, me disheron kaji 2.000 personas. Tienen 4 Restoranes Kasher. Ke enteresante no? Por este karar de puevlo 4 restoranes.Ama me disheron vijitan munchos turistos Djudyos. El Gulash ke komi aya ke karar ke me plazyo; a la otra noche yene me fuyi aya i le dishe al garson no kero la lista de menu. Kero la komida ke komi ayer la noche, el Gulash.
Una vez estavamos en Budapest. Ivamos a pasar la noche de Shabat aya. Dishimos kon los amigos toparemos un Restoran Kasher, komeremos i azeremos el kidush aya. Topimos un otel ke era "Glatt Kosher", izimos la rezervasyon antes de irmos i pagimos un buen presyo. Mos asentimos artos i mos alevantimos ambiyertos! Era el menu Ashkenazi!
En Rusia estavamos en Mosku i en St. Petersburg. Kuado vijitimos las Sinagogas, topimos aryento de las Sinagogas restoranes Kasher. Las komidas eran komo el spesyal de Rusos. Gostimos de akeyas komidas, mos plazyo. Tambiyen i aki komimos karnes.
Kuando mos fuimos al tur de Sud Amerika, Argentina-Uruguay-Brasil en Buenos Aires aviya un Restorante de karne. Ya se save las karnes de Argentina son muy savrozas. Kijimos de todo poko poko ke trayga. Gostimos kaji de todas las savores.
En Sofya aviya un Restorante Kasher. El servisyo komo de Israel. Salatas, Humus falafel i karnes. Mozotros komimos Gayna asada, patatas fritas i unas kuantas salatas, i al lado una birika yelada.
Este karar ke kaminimos i topimos Restoranes Kasher malorozomante en Estanbol solo ay un Restoran Kasher. Kuando me iva aya, a vezes no aviya lahmadjun, a vezes no se topava doner. Por esto ay anyos ke no me vo. En mi chikes aviya 2 lokantas en Eminönü ke eran "Esnaf Lokantası". Ke ermozas komidas spesyales Sefaradis gizavan. Aviya el Restorante "Karne" ke ermozo de menus ke se topava. Ke shiklik era. Malorozamente se serraron.
