Ya paso un mez de la desgrasia del 7 Oktobre 2023. Yo no vide los videos sovre lo ke izieron los miembros del Hamas en Israel. Ma kontan ke es una desgrasia. No se ken filmo estas salvajerias. O estos filmos fueron segidos por munchos prezidentes Amerikanos i Evropeos. Dospues ke vieron estos filmos dingunos no akuzaron a Israel dizyendo “deke tantas bombas a Gaza?” Mizmo kuando amostraron estas desgrasias en la Kneset, en el Parlamento Israelyano, todos los miembros de la Kneset fueron influensados de mala manera. Dingunos no keremos ver gerras, muertos, feridos, personas ke deven de abandonar sus kazas, personas ke tyenen de menester mizmo de una kupa de agua; ma el Governo de Gerra de Israel desidio de salvarse de estos miembros del Hamas i de estos tuneles ke fueron fraguados kon las paras ke fueron mandadas para los Palestinianos ke biven en Gaza. Oy en diya se avla ke el kapo del Hamas, Halid Meshal poseda una fortuna de 5 milyardas. Dezgrasia. Se avlava la mizma koza por Arafat. Era muy riko. I dospues de su muerte los Palestinianos trataron kon su mujer para tomar atras una grande partida de la moneda ke posedava. I los funerales no se realizaron asta ke acheta este akordo.
Malorozamente si estas paras se gastavan para la prosperidad de los Palestinianos, todo puediya ser diferente. Malorozamente oy estamos viendo ke esta gerra no se va eskapar en unos kuantos diyas porke Israel dyo karar de destruir los tuneles ke es un perikolo muy emportante para el payiz.
Espero ke las dos partes van a pedrer pokas almas. O si alkansan a formar una rejyon de tampon puedeser esto va ser el remedio para pueder bivir en pas.
Bivir i ver.
