Kristallnacht, literalmente la Noche de los Kristales, ma ke se konose jeneralmente komo la Noche de los Vidros Rotos, (para mi se deve yamarse “Los Pogromes de Noviembre” para eksplikar la realidad) fue un punto trajiko de ruptura en el destino de la komunidad Djudia de la Almanya. El pogromo en todo el paíz empeso el 9 de Noviembre de 1938 i kontinuó asta el 10. No afito solo en Almanya, i de mas se propajo en la Austria i en el Sudetenland (la parte norte de la vyeja Chekoslovakya ke fue aneksado por los Almanes en el primo de Oktubre 1938). Durante el Kristallnacht, serka de 100 Djudios fueron asasinados, 30.000 ombres Djudios fueron arrestados, syenes de sinagogas fueron kemadas i profanadas i mas de 7.000 botikas de Djudios fueron vandalizadas i sus vitrinas rompidas (de esto vyene el nombre Kristallnacht). No abasta esto todo, la komunidad Djudia fue kondemnada a pagar todos los danyos al Reich, una suma serka un de milliarda de RM.
Todas las viyolensas fueron orkestados por el ministro de Propaganda Nazi, Joseph Goebbels. Ma, los dirijentes Nazis ensistyeron firmamente ke los evenementos fueron un revolto spontaneo del puevlo Alman kontra los Djudios. Tambyen utilizaron kulpas inventadas kontra los Djudios para promulgar mas leyes opresivas kontra eyos, entre otros komo dishe mas ariva, la kompensasyon de los pagamyentos de seguridad por las propiedades destruyidas en los pogromos.
La ekskuza para este pogromo “spontaneo” fue la muerte, el 9 de Noviembre, del diplomato alman, Ernst vom Rath en París. Lo firyo un joven Djudio de 17 anyos, Herschel Grynszpan. Grynszpan era un joven, desempleado i rezidente illegal ke keriya evitar la deportasyon de París, lo firyo al diplomato por reaksyon a la deportasyon de su famiya a Polonya. La famiya Grynszpan aviya bivido en Hannover, Almanya desde 1911. En Oktubre de 1938, los almanes ekspulsaron a todos los Djudios polakos de las tyerras almanas djusto kuando la Polonya se estava al punto de implementar una mueva ley ke eliminava la suditensya polaka a kualker ke bivyo afuera de Polonya durante mas de sinko anyos. I pormo de esto, la Polonya refuzo a akseptar a estos refujyados i 12.000 Djudios fueron embiyados a los kampos de refujyados en la frontyera.
La partisipasyon de los sivdadinos Almanes en los pogromos, o a lo menos la mankura de protestos de los vizinos (i de los paizes vizinos), afirmo la kreyensa de los Nazis de ke podiyan azer lo ke keriyan kontra los Djudios. Las operasyones i leyes opresivas anteriores no estavan tan viyolentes, ma la Kristallnacht fue el primer paso verso la salvajeriya de la “Solusyon Final”.
El 9-10 Noviembre pasado era el 85en aniversaryo del Kristallnacht.
