La istoria de Or-Ahaim empesa en los anyos dalkavo del dizimueven siglo, en el mandato de Sultan Abdulhamit II. El ospital fue fondado kon los esfuersos de unos kuantos filantropos para prokurar ayuda medikal a los hazinos menesterozos.
Or-Ahaim empeso komo una chika klinika, kon las kontribusiones de doktores idealistos i de filantropos. Uno de estos doktores idealistos era el doktor de Atatürk, Dr. Samuel Abrevaya Marmaralı.
En los diyas de la Primera Gerra Mondial, Or-Ahaim avrio sus puertas a todos los hazinos sin diskriminasion de relijion, o de rasa. Malgrado todas las difikultades del tiempo de la gerra, todos los soldados firidos fueron kurados.
Or-Ahaim, kon grande sakrifisios de los volontarios de la komunitad, kontinuo su ayuda medikal en la Segunda Gerra Mondial, en la Gerra de los Balkanes, en la okupasion de Estambol, i en diversas emigrasiones.
Este anyo, Or-Ahaim esta selebrando su sieniventisinken aniversario. Munchos emportantes progresos tuvieron lugar desde la fondasion del ospital. Ma, las mas grandes inovasiones fueron echas despues del empesijo de los anyos 2000.
En el anyo 2005, un muevo edifisio fue konstruido en lugar del viejo edifisio ke fue derrokado. Oy, el ospital tiene una Klinika de Geriatria ke es una de las pokas en la Turkiya. En el anyo 2006, el Sentro de Terapia Fizika, i de Rehabilitasion empeso su servisio ekipado kon ekipos modernos de doktores i munchas muevas inovasiones entraron en vida.
En el anyo 2007, el ospital se konvertio en un ospital mas preferado, ande los hazinos estan aresiviendo un mijor servisio, i estan mijor kurados. Las Salas de Shirurjia i el Sentro de Maternidad tambien entraron en servisio en los anyos dalkavo. En el empesijo del anyo 2010, muevas unidades (Rezonansia Manyetika, Tomografia Komputarizada, Kardiolojia, Shirurjia de Serebro, Shirurjia Plastika, i Shirurjia Infantil) fueron aviertas.
Oy, las unidades medikales de muestro ospital son: servisio de estados urjentes, salas de operasion, neroshirurjia, pediatria, fizioterapia i reabilitasion, shirurjia jeneral, oftalmolojia, enfermedades del toraks i alerjias, enfermedades enternas, jinekolojia i obstetrisia, kardiolojia, otorinolarinjolojia, laboratorio, estetika medikal, nerolojia, ortopedia, perinatolojia, radiolojia, urolojia.
Muestro ospital tiene akuerdos kon Institusiones de Seguridad Sosial, i kon munchas Kompanyias de Seguridad Privada, i prokura servisios a munchos hazinos ke no tienen dinguna seguridad medikal.
Un ekipo de volontarias, ‘Pembe Melekler’ (Anjelos Roz) lavoran en el ospital para reaktivar la alegriya de la vida de los hazinos, se okupan de los menesteres de los hazinos, i azen diversas terapias a los viejos para ke se sientan atados a la vida.
Los ke prefaran sirkunsizar sus kreaturas en un ospital, estan aziendo mezmo la selebrasion de sirkonsizion en la Sinagoga del ospital, i estan fiestando esta alegriya en la ermoza guerta del Or-Ahaim ke fue ermozeyada en los diyas dalkavo.
Por todas estas inovasiones, devemos de remersiar el prezidente del ospital, Yaşar Abuaf, i su ekipo laboriozo por sus esforsos i sus sakrifisios volontarios. Este ekipo de volontarios, i los mijores doktores, estan aziendo todos sus poderes para rezolver todo modo de problemes de salud de la institusion, i de los hazinos.
Kon el apoyo de muestra komunidad, Or-Ahaim, de diya en diya, se va ir mas adelantre, i va kontinuar a dar el mijor servisio posivle.
