No entiendo deke las personas se keren azer mas orivles i mas feyos posivles.
Kero avlar de Halloween. En la Amerika del Sud lo yaman “El diya de los muertos”. Ya esta bien ke keren nombrar a los defundos. I mozotros tenemos los diyas kuando azemos ziyara, nombramos a muestros keridos, les azemos orasyones, les auguramos ke sus almas repozen en Gan Eden i este karar. Nunka pensamos a vistirmos komo los ke se topan aryentro de las tombas, meter boyas komo sangre a las karas etc.
En la Amerika i en munchos otros payizes, el 31 de Oktubre se fiesta Halloween. Es una fiesta muy popular. Aparte de las personas, i las kayes i las guertas i las kazas se dekoran kon ojas amariyas del otonyo. Las ventanas i los balkones son dekorados kon tiralanyas, kuervos, fantomes i monstres. Mas i mas se dekora kon kalavasas koloradas. Formas i formas i boyes i boyes de kalavasas se kavakan, se mete aryentro kandelas i kuando las asyenden se ven muy ermozas figuras. Las personas se visten komo brushas o komo eskeletas. A los ijikos tanbien les plaze fiestar este diya. I eyos toman un sesto en la mano i kaminan de kaza en kaza para arekojer bonbones. Los ijikos aharvan las puertas i demandan bonbones en dizyendo “trick or treat?” Esto kere dizir o me das bonbones o te ago shakas pezgadas. Siguro ke los de kaza se akavidan kon munchos bonbones i les dan. Si algun vizino aksi no les kere dar bonbones alora les echan guevos a la puerta o les echan boyas koloradas ke se ven komo sangre, por djeza. Se vido munchos kavzos ke abuzaron las kriyaturas. Por esto agora ay i un grande a sus lados para protejarlos. Mizmo aki en Turkiya ay un uzo. En las fiestas relijyozas, las kriyaturikas chikas se van de vizinos a vizinos a bezarles las manos de los grandes, i los grandes les ofren bonbones i un poko de paras aryentro de una rida. Unos kuantos anyos antes uvo un kavzo ke dos ijikas de 5-6 anyos salieron de kaza i no tornaron mas. Despues salyo en medyo ke un vizino las abuzo i despues las mato. Por esto i este uzo ermozo ke viene desde munchos siglos se alevanto.
A la fin del diya miran ken arekojo mas munchos bonbones.
El orijen de esta fiesta viene del tiempo Medieval en la Evropa. Akel tiempo fiestavan este diya komo fiesta de la rekolta. Ma despues del siglo 20, se transformo en una fiesta komersiala i se desvelopo kada anyo un poko mas. Ampesaron a vistirsen kostümes, despues ampesaron a makiyarsen, azer partis i arekojer dulsuryas.
Sigun mi en muestro tiempo ke tenemos diyas difisiles, seya el mantenimyento, seya la politika o las pandemiyas i hazinuras, la djente esta bushkando o enventando fiestas para alegrarsen. Siempre ke tengamos alegriyas.
