El konsepto de la buendad, sentimyentos komo la felisidad, es mas ke pensamyentos o empatiya kon el den frente, kontyene aksyon i movimyento asi komo emosyon i pensamyento. Kuando miramos al diksyonaryo para identifikar la buendad dize: ayudar sin asperar nada del den frente.
La buendad es el amor en aksyon.
“Si esto pensando, es ke egzisto”. La buendad si se aze del korason i si se komparte, torna al umano kon el dopyo. La kerensya torna a ti. Sovre esto vos kero kontar una istorya.
Al tyempo aviya un kavedji ke aziya kaves. Su magazen era yeno de personas de diferentes relijyones. Un dia uno vino a este kafe, i mirando al grego ke estava asentado dyo orden al kavedji. “A todos un kafe de mi parte, a la eksepsion de este grego” disho el ombre. El, dyo a todos el kafe, i a la fin tomo dos findjanes de kave i se fue, se asento al lado del grego.
El ombre ke ofryo a todos se inyervo, ma el patron le disho:
“Estos kafes no es de tu parte, es de mi parte”.
Despues un syerto tyempo ke paso, los gregos se revoltaron en la izla de “Sisam”. El patron del kafe estava en el grupo de militares ke se fueron a gerrear kon los revolusyonaryos, ma fue kapturado.
Akel tyempo los gregos vendiyan los esklavos en el merkado. El patron del kafe estava tambyen en el merkado de esklavos i estava asperando su destino. En supito vino un grego i lo merko. En kaminando el ke lo merko lo trusho al esklavo a una kaleja ande no aviya dingunos, i le demando: “Me konosites?
Tu me aviyas ofrido akel kafe en el magazen. Tu puede ser te olvitates, ma mizmo si pasa 40 anyos, yo no me puedo olvidar de akel kafe. Agora estas libre, ke tu kamino seya avyerto!” le disho. De aki vyene la dicha “Una tasa de kafe se rekuerda durante 40 anyos”.
Las personas ke azen buendades, son konosidos komo buenas personas, en sus entornos son mas amados. Si tyenen menester de kualker koza, pueden topar apoyo mas fasilmente. Djusto al kontraryo, los individuos agresivos u egoistos biven la soledad mas muncho i topan ayuda mas difisil.
La buendad mos aze orozos i da sentido a la vida. Esta buendad aze orozo al den frente, ma aze orozo tambyen al ke lo aze. La Universita British Columbia izo un lavoro sovre este sujeto i demando a un grupo de personas ke gasten
50 dolares durante el dia. A la fin del dia se vido ke las personas ke gastaron moneda para ayudar a otras personas en lugar de simplemente merkar kozas para si, se sintyeron mas orozos.
Azer buendades amingua el stres i indirektamente mos proteja tambyen de problemas de salud relasyonadas kon el stres. La buendad amingua la depresyon i la anksyete.
Kuando azemos buendades, se produiza la seretonina ke es konosida komo la substansya kimika del byenestar.
En lugar de koronavirus, si el virus de la buendad se propaja, los efektos kurativos de la buendad esta en muestras manos.
