Las profesoras son aplodizadas por sus devuamientos en el mundo entero. Son konsideradas komo las kreativas de una nasion. Se okupan de las kreaturas desde sinko o sesh anyos asta ke tienen 18 - 20 anyos. Los anyos de formasion de una kreatura determinan el tipo de persona ke va ser, i esto esta prensipalmente en las manos de sus maestras. Kale ekspresar muestra gratitud por la dedikasion ke amostran las profesoras. Para alavar sus servisios, la UNESCO empeso la tradision de selebrar el Dia de las Maestras en el mundo entero en el anyo 1994.
Determinaron un dia para akordarmos de muestras keridas maestras. La enfluensia de una profesora sovre un elevo se espande mas aya de la klasa. Las profesoras azen un grande esfuerso para entender sus elevos i adresarsen a eyos de todo sus korason. Amostran grande tino para formar el karakter de los elevos, ansi les ayudan a ambezarsen a tener responsabilidad sosyal.
El Dia de las Maestras es una okazion para akodrarmos de muestras keridas maestras i agradeserles el rolo ke djugaron en muestras vidas. Una maestra es la piedra de fragua enriva la kuala se konstruye una sosiedad. La responsabilidad de una maestra es grande, porke egzekuta el lavoro de formar meoyos entelektuales i kreativos ke van a ser el futuro de la sosiedad.
En muestro pais el Dia de Maestras se selebra el 24 de Novembre. Akel dia mos akodramos, apresiamos, aplodizamos i agredisamos muestras maestras ke aseguraron la orientasion, i el apoyo entelektual i moral de muestra vida. No emporta la edad ke tengamos; ay algunas maestras kon las kualas mos va gustar kompartir el progreso ke enrejistrimos en muestras vidas, algunas ke mos entienden i mos kreen mas muncho de muestros padres. El Dia de Maestras es una oportunidad para ke estas maestras sepan ke karar de enfluensa tuvieron en muestras vidas.
Oy, las personas deven ambezarsen muevas kozas kada diya i developar sus talentos para pueder alkansar a los trokamientos kontinuales de la teknolojiya. Los medios de komunikasyon mos estan prokurando todo modo de enformasion. El kargo de las maestras esta ogmantando de diya en diya. Las maestras estan partisipando en kursos para developar muevas metodes de ensenyar, para ambezarsen las novedades de la teknolojia i las muevas metodes de edukasion. Eyas mezmo se estan aziendo elevas para pueder alkansar a la reforma de edukasion.
Oy, mas de siempre, las maestras tienen menester del apoyo i de la proteksion de los governos i del puevlo para pueder sostener el kargo de estas responsabilidades.
Esperamos ke esta profesion, ke es tan respektada en el mundo entero, va elevar su status, va ganar mas muncho prestijio, i ansi, en el futuro, las maestras van a reushir a ganar sus derechos, i a tener mijores kondisiones de lavoro i de vida.
