Los myembros del kurso al kual me vo, BEYOĞLU KLASİK MUSİKİ DERNEĞİ, uzan kada anyo de ir a Ankara i vijitar el mozoleo de Atatürk.
Este anyo, komo fyestimos los 100 anyos de la fondasyon de la Republika Turka, organizaron el viyaje entre el diya de la fondasyon ke es 29 Oktobre i el diya de la muerte de Atatürk, ke es el 10 de Novembre.
Me demandaron si kero asistir. En primero me dishe, ke va azer aya, ya konosko esta sivdad, ya me tengo ido munchas vezes ma dospues me vino al tino, el anyo pasado kuando mos fuimos a dar un konserto a “Uşak” aviya dicho la mizma koza ma kuando me fui, tanto mos divertimos ke torni enkantada.
De vista aksepti i partisipi. El 4 de Novembre a las 5 de la demanyana mos topimos prontos en la estasyon de otobus, para salir a kamino. Aunke estavan todos medyos durmyendos, apenas se alevanto el otobus, empesaron a kantar en gritando imnos Turkos ke ya konosemos todos. Veramente un grupo muy alegre, fin el shofor se mareo i disho:
“Sefte ke vide en esta ora de la demanyana esta manera un grupo tan dinamik, jeneralmente todos durmen”.
En kantando no entendimos komo pasaron las 3 oras de kamino i arivimos a BOLU. Ya estava organizado de Estanbol el dezayuno en una montanya de un kazal. Enturado de rozas i yervas vedres, un aver limpyo i un aresivo muy kayente. Todo fresko i organik no va kontar lo ke aviya en las mezas solo kontimos 35 almas, konsumimos kaji 50 panes freskos echos de kaza.
Kontinuimos al kamino kon kantes i arivimos a Ankara. Aya ya mos estava asperando el gid turistiko. La primera parada fue el mozoleo. Un kamino byen largo i byen asigurado ke es defendido de entrar kon otobus.
Kuando arivimo ariva, no era posivle de no ser enfluensado. Vyejos i vyejas kon bastones, madres i padres kon kriyos en los ombros, elevos i elevas kon bandyeras en las manos, kurto una djentorya de todas las edades, veramente una vista muy sentimental. Dospues entrimos al muzeo i tomimos kamino para komer de midi. Todos dishimos ke estamos artos ma eskapimos las kalderas de supa i el braso de doner del restoran. Esto es ke estavamos artos, si estavamos ambyertos no se kualo iva afitar!
De aya mos fuimos al kastiyo istoriko de Ankara ke se topa en el sentro Altındağ. Una vista maraviyoza. Kuando vinimos al otel teniyamos solo medya ora para aparejarmos a la nochada ke organizaron. Una taverna muy ermoza, una orkestra muy alegre i un menu alavado.
A la otra demanyana, diya de alhad dezayunimos muy demprano porke aviya un program muy ermozo. En primero vijitimos la gran asamblea nasyonal vyeja, bevimos kafe en el sentro HAMAM EVLERİ i partimos por BEYPAZARI.
Beypazarı es un bazar ande topas lo keres, merkimos i merkimos i tomimos kamino para Estanbol.
Todo estava muy ermozo, muy alegre i muy enteresante si al otro diya no me tomava la kriza de erni diskal.
